Shavkat Mirziyoyev 27-may kuni Yevrosiyo iqtisodiy ittifoqining yig‘ilishida tashkilot huzuridagi kuzatuvchi davlat rahbari sifatida ishtirok etdi. Bu haqda Prezident matbuot xizmati xabar qildi.
Qayd etilishicha, yig‘ilish Qirg‘iziston prezidenti Sadir Japarov raisligida videoanjuman shaklida o‘tgan. Tadbirda Rossiya prezidenti Vladimir Putin, Belarus prezidenti Aleksandr Lukashenko, Qozog‘iston prezidenti Qosim-Jo‘mart To‘qayev, Armaniston bosh vaziri Nikol Pashinyan, Yevrosiyo iqtisodiy ittifoqi (YOII) huzuridagi kuzatuvchi mamlakat — Kuba prezidenti Migel Bermudes va Yevrosiyo iqtisodiy komissiyasi hay’ati raisi Mixail Myasnikovich ham qatnashgan.
Yig‘ilish kun tartibidan YOII makonida o‘zaro manfaatli hamkorlikni rivojlantirish va integratsiya jarayonlarini chuqurlashtirish, shu jumladan iqtisodiyot, savdo, sanoat, transport va boshqa yo‘nalishlarda amaliy sheriklikni mustahkamlash masalalari o‘rin oldi. Shavkat Mirziyoyev nutqining avvalida Qirg‘iziston YOIIga raislikni faol amalga oshirayotgani, bu tashkilot doirasidagi ko‘p qirrali hamkorlikni kengaytirishga xizmat qilayotganini qayd etgan. Birgalikdagi sa’y-harakatlar bilan pandemiyaning salbiy oqibatlari yumshatilgani hamda mamlakatlarimiz o‘rtasidagi savdo-iqtisodiy hamkorlikda ijobiy sur’at ta’minlanayotgani ta’kidlangan.
Prezident O‘zbekiston va YOII mamlakatlari o‘rtasidagi savdoda texnik to‘siqlarni bartaraf etishni davom ettirish va sertifikatlashtirishni o‘zaro tan olishga chaqirgan. Bu tovarlarning bozorlarimizga kirib borishini ancha soddalashtirishga xizmat qiladi. Birgalikda qishloq xo‘jaligi ekinlarini yetishtirish va oziq-ovqat mahsulotlarini ishlab chiqarish orqali agrosanoat kooperatsiyasini kengaytirish alohida dolzarb ahamiyatga ega ekani ta’kidlangan. Bu boradagi natijadorlikni oshirish maqsadida hududlararo aloqalarni faollashtirishni nazarda tutadigan Agrokooperatsiya dasturini ishlab chiqish taklif qilingan.
O‘zbekiston yetakchisi muqobil transport yo‘laklarini rivojlantirish hamda Janub va Sharq yo‘nalishida transport jihatidan o‘zaro bog‘liqlikni mustahkamlash zarurligiga e’tiborni qaratgan. Shu munosabat bilan Osiyo—Tinch okeani mintaqasi bozorlariga chiqish uchun qo‘shimcha imkoniyatlar yaratadigan O‘zbekiston—Qirg‘iziston—Xitoy temir yo‘lini barpo etish loyihasini amalga oshirishni tez fursatda boshlash muhim ekani ta’kidlangan. Termiz shahridan Pokistonning Peshovar shahrigacha Janubiy Osiyo va uning ikki milliard nafar iste’molchiga ega bozoriga chiqish uchun eng qisqa yo‘lni ta’minlaydigan transafg‘on temir yo‘lini qurish loyihasini amalga oshirishda hamkorlik qilishga tayyorlik bildirilgan.
Iqtisodiy taraqqiyotning tabiiy drayveriga aylanishi lozim bo‘lgan turizm sohasidagi sa’y-harakatlarni birlashtirish, shuningdek, mamlakatlar o‘rtasidagi yo‘lovchi transporti qatnovini to‘liq hajmda tiklash zarurligiga alohida e’tibor qaratilgan. Davlat rahbari O‘zbekistonda YOII mamlakatlarining yetakchi kompaniyalari ishtirokida Turizm industriyasini rivojlantirish forumini o‘tkazish taklifini ilgari surgan.
Shavkat Mirziyoyev o‘z nutqining yakunida O‘zbekistonning mamlakatlar barqaror taraqqiyotini ta’minlash va farovonligini yuksaltirish maqsadida Yevrosiyo iqtisodiy ittifoqi bilan o‘zaro manfaatli hamkorlik va ko‘p qirrali sheriklikni izchil mustahkamlashga intilishi qat’iy ekanini yana bir bor tasdiqlagan.
“TASS”ning xabar berishicha, O‘zbekiston Yevrosiyo iqtisodiy ittifoqi bilan kuzatuvchi maqomida sheriklik munosabatlarini rivojlantirish tarafdori. Mirziyoyev yig‘ilishdagi nutqida bu haqda alohida to‘xtalib o‘tgan.
“O‘zbekiston kuzatuvchi maqomida ittifoq bilan sheriklik munosabatlarini rivojlantirishda davom etadi. Bu biz uchun juda muhim, chunki YOII mamlakatlari bizning asosiy hamkorlarimiz hisoblanadi
Mamlakatning tashkilot bilan o‘zaro manfaatli hamkorlikni izchil rivojlantirish tarafdori ekanini yana bir bor tasdiqlamoqchiman. Ishonchim komilki, bugungi uchrashuv natijalari ko‘p qirrali sheriklikni yanada mustahkamlash, YOII mamlakatlarida barqaror iqtisodiy rivojlanishning va O‘zbekistonda farovonlikning o‘sishiga xizmat qiladi”, — degan prezident.
Avvalroq O‘zbekiston Yevrosiyo taraqqiyot bankiga a’zo bo‘lishga tayyorlanayotgani, O‘zbekiston YOIIning iqlim, raqamlashtirish va logistika loyihalariga qo‘shilmoqchi ekani xabar qilingandi.
Izoh (0)