O‘zbekiston Yevrosiyo iqtisodiy ittifoqi (YeOII) bilan investitsiyaviy hamkorlikni oshirishga tayyor, deb xabar bermoqda Investitsiyalar va tashqi savdo vazirligi matbuot xizmati.
Xususan, Yevrosiyo taraqqiyot banki va Yevrosiyo barqarorlashtirish va rivojlantirish jamg‘armasi bilan hamkorlik istiqbollari muhokama qilinmoqda.
Hamkorlik masalasi 15-mart kuni O‘zbekiston hukumati delegatsiyasining Rossiyaga tashrifi doirasida bosh vazir o‘rinbosari — investitsiyalar va tashqi savdo vaziri Sardor Umrzoqovning Yevrosiyo iqtisodiy komissiyasi (YeOIK) raisi Mixail Myasnikovich va savdo bo‘yicha YeOIK hayati a’zosi (vaziri) Andrey Slepnyov bilan uchrashuvda muhokama qilingan.
Tomonlar, shuningdek, investitsiyaviy hamkorlik va sanoat kooperatsiyasini kengaytirish, to‘siqlarsiz o‘zaro savdo qilishga sharoitlar yaratish va mintaqaning tranzit salohiyatidan foydalanish samaradorligini oshirish bo‘yicha qo‘shma kompleks dasturlarini hayotga tatbiq etishga tayyor ekanligini bildirgan.
Uchrashuv yakunida yuzaga keladigan barcha masalalarni zudlik bilan hal etish maqsadida YeOIK bilan ekspertlar darajasida doimiy aloqalar mexanizmini joriy etish bo‘yicha kelishuvga erishilgan.
Qayd etilishicha, bu ham O‘zbekiston va YeOII o‘rtasida samarali hamkorlikni rivojlantirishga yordam beradi.
Eslatib o‘tamiz, O‘zbekiston 2020-yilning dekabrida Yevrosiyo iqtisodiy ittifoqida rasman kuzatuvchi-davlat maqomini olgan. 2021-yilning yanvarida O‘zbekistonning YeOII bilan hamkorligi bo‘yicha 2021-yilga oid “yo‘l xaritasi” tasdiqlandi, fevral oyida O‘zbekistonning Yevrosiyo iqtisodiy komissiyasidagi vakili tayinlandi.