Veterinariya qo‘mitasida ehtimoliy korrupsion holatlar o‘rganilmoqda — Namanganda qoramol uchun ajratilgan 400 million so‘m subsidiyani noqonuniy o‘zlashtirish bo‘yicha jinoyat ishi qo‘zg‘atilgan
Veterinariya va chorvachilikni rivojlantirish davlat qo‘mitasi Korrupsiyaga qarshi kurash ichki bo‘limi boshlig‘i Komil Qoriyev qo‘mita tizimida korrupsiyaga qarshi kurashish borasida olib borilayotgan ishlar yuzasidan “Daryo” nashriga ma’lumot berdi.
Komil Qoriyevning aytishicha, qo‘mita tomonidan fermer xo‘jaliklariga chet eldan qoramol sotib olishlari uchun ajratiladigan subsidiyalar ajratilish holatlarini o‘rganmoqda.
“Sababi ba’zi hollarda subsidiya uchun fermerlar emas, balki boshqa, aniqrog‘i, o‘rtakashlar ularning nomidan ariza topshirgan holatlari kuzatilmoqda. Ular go‘yoki fermerlarga hujjatlarni tayyorlashda yordam bergandek ko‘rinib, yakunda esa muammolar kelib chiqishiga sabab bo‘lmoqda. Shunday holatlardan biri Namangan viloyatida kuzatilgan. Bu bo‘yicha viloyat prokuraturasi tomonidan 400 million so‘mlik subsidiya mablag‘larini noqonuniy o‘zlashtirilganlik yuzasidan jinoyat ishi qo‘zg‘atilgan. Holat yuzasidan qo‘mita o‘z vakolati doirasida xizmat tekshiruvi o‘tkazib, tegishli organlarga taqdim etdi. Hozirda tergov jarayonlari ketayotgani bois barcha tafsilotlarni aytolmayman. Tergov ishi yakunlanganidan so‘ng qo‘shimcha ma’lumot taqdim etamiz”, — dedi qo‘mita vakili.
Suhbatda ta’kidlanishicha, subsidiya ajratishga ko‘proq e’tibor qaratishning sababi — bu qaytarmaslik sharti bilan fermerlarga berilayotgan davlatning mablag‘lari.
“Uni qayerga va qay maqsadda ishlatilayotganini o‘rganish va noqonuniy o‘zlashtirilganlarini yana budjetga qaytarish asosiy vazifamiz hisoblanadi. Shuningdek, chet eldan subsidiya evaziga olib kelingan qoramollarni arizada ko‘rsatilgan bosh soniga qay darajada mosligini ham o‘rganish ishlari olib borilmoqda. Joylarga chiqqan holda fermer xo‘jaliklari uchun qoramol boqish uchun ajratilayotgan yerlarni berish tartibini ham ko‘rib chiqmoqdamiz. Bunda yerdan qanday foydalanayotgani, ko‘rsatilgan qoramol haqiqatan ham bor yoki yo‘qligini tizimli ravishda kuzatib bormoqdamiz”, — dedi Komil Qoriyev.
Uning qo‘shimcha qilishicha, 2022-yil boshidan buyon qo‘mita tizimida birorta korrupsion holat aniqlanmagan.
“Agar o‘rganishlarimiz natijasida biror korrupsion holat aniqlangudek bo‘lsa, albatta, tegishli tartibda huquqni muhofaza qiluvchi organlarga taqdim etamiz. Shu bilan birga, uning natijalari haqida jamoatchilikni ham xabardor qilib boramiz”, — dedi u.
Ma’lumot uchun, prezident qaroriga muvofiq 2021-yil 1-oktabrdan boshlab barcha davlat organlari va tashkilotlari, shu jumladan, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarida mavjud shtat birliklari doirasida korrupsiyaga qarshi ichki nazorat tuzilmalari faoliyati yo‘lga qo‘yilgan.
Belgilanishicha, korrupsiyaga qarshi ichki nazorat tuzilmalari korrupsiya holatlarini barvaqt aniqlash va oldini olish, ularning sabab va shart-sharoitlarini bartaraf etish, manfaatlar to‘qnashuviga yo‘l qo‘ymaslik hamda korrupsiyaga nisbatan murosasiz munosabatni shakllantirish choralarini ko‘rish uchun mas’ul hisoblanadi.
