Daxlsizligidan mahrum etilib, qilgan jinoyatlari uchun 5 yil muddatga ozodlikdan mahrum qilingan Xalq deputatlari Andijon shahar kengashining sobiq deputati Shuhrat Karimov tomonidan noqonuniy qurilgani aytilgan binolar MIB tomonidan buzib tashlanmoqda Bu haqda “Daryo” muxbiri xabar berdi.
MIBning Andijon viloyati boshqarmasi ma’lumotiga ko‘ra, Fuqarolik ishlari bo‘yicha Andijon tumanlararo sudining 2021-yil 22-iyundagi ijro hujjatiga asosan “Alliance road construction” MCHJga ajratib berilgan 4 gektar yer maydonidan tashqari ortiqcha 1,26 gektar yer maydoniga qurilgan 17 ta har biri 400 kv.metrdan iborat qurilishi tugallanmagan binolar, 5 ta har biri 400 kv.metrdan iborat yer maydonidagi beton fundament qurilmalar jamiyat ta’sischisi Shuhrat Karimov hisobidan buzdirilishi belgilangan.
Mazkur ijro hujjatining ijrosini ta’minlash maqsadida 2021-yilning 11-noyabr kuni majburiy ijro harakatlari tayinlangan hamda ijro hujjatining ijrosini ixtiyoriy ravishda bajarishi uchun qarzdor jamiyatga muddat berilgan. Shu sababli ijro ishi keyinga qoldirilgan.
Biroq Byuro xodimlari tomonidan taraflar bir necha bor ogohlantirilgan bo‘lishiga qaramasdan, noqonuniy qurilmalar ixtiyoriy ravishda buzdirilmagan. Shundan so‘ng, majburiy ijro harakatlariga kirishilgan.
2022-yilning 19-may kuni olib borilgan ijro harakatlari davomida 1,26 gektar yer maydoniga qurilgan qurilishi tugallanmagan binolar buzilishi boshlangan. Hozirda ijro harakatlari davom etmoqda.
Eslatib o‘tamiz, Xalq deputatlari Andijon shahar kengashining 2021-yil 17-maydagi sessiyasida bir guruh deputatlar tintuvdan o‘tkazilgani, sessiyada Andijonda yer sotuvchilarning kirdikorlarini fosh qilgan deputat prokuror taqdimnomasiga ko‘ra, daxlsizlik huquqidan mahrum qilingani ma’lum qilingandi.
“Daryo” muxbiri vaziyatga oydinlik kiritish maqsadida jurnalistik surishtiruv o‘tkazgandi. Shuhrat Karimov “Daryo” muxbiriga bergan intervyusida deputat sifatida qonun va qonunosti hujjatlar ijrosini xalqqa yetkazish va ijrosini nazorat qilishga harakat qilgani, shu sababli bir qator tashkilotlarga tegishli tartibda deputatlik so‘rovlari yuborgani, bu esa mutasaddilarga yoqmaganini bildirgandi.
Andijon shahar hokimi Bahrom Haydarov esa deputat Shuhrat Karimov o‘ziga ajratilgan to‘rt gektar yer maydoni atrofidagi qo‘shimcha olti gektarni ham noqonuniy qo‘shib olgani, o‘ziga biriktirilgan yerdan ko‘p qavatli uylar, kottejlar, maishiy xizmat binolari qurishi kerak bo‘lgan bo‘lsa-da, belgilangan ishlar amalga oshirilmagani ta’kidlagan.
Oradan bir oy o‘tib, daxlsizlik huquqidan mahrum qilingan deputat Jinoyat ishlari bo‘yicha Izboskan tumani sudining 2021-yil 23-iyundagi ajrimiga muvofiq Jinoyat kodeksining 168-moddasi 3-qismi “b” (firibgarlik) bandi va boshqa moddalar bilan gumon qilinib, unga nisbatan qamoqqa olish ehtiyot chorasi qo‘llanilgani xabar qilingandi.
“Daryo” muxbirining aniqlashtirishicha, daxlsizlik huquqidan mahrum bo‘lgan deputat 2021-yilning noyabr oyida 5 yil 2 oy muddatga ozodlikdan mahrum qilingan.
Izoh (0)