Namanganda Nexia va Hyundai Porter rusumli avtomobillar ishtirokida yo‘l-transport hodisasi ro‘y berdi. Bu haqda “Daryo”ga viloyat IIB matbuot xizmati ma’lum qildi.
Hodisa 2022-yil 25-may kuni soat 13:00 atrofida Eshobod—Namangan—Yangiqo‘rg‘on—Kalishox avtomobil yo‘lining 14-kilometrida, Yangiqo‘rg‘on tumanining “Qizilqiyoq” mahallasi hududida ro‘y bergan. 19 yoshli Nexia haydovchisi harakat xavfsizligini ta’minlay olmay, qarama-qarshi yo‘nalishga chiqib ketib, 1993-yilda tug‘ilgan haydovchi boshqaruvidagi Hyundai Porter avtomobili bilan to‘qnashgan.
Ushbu avtohalokat oqibatida Namangan shahridagi maktablardan birining 7-sinf o‘quvchi qizi jiddiy jarohat olib, shifoxonaga yotqizilgan. Biroq ko‘rsatilgan tibbiy muolajalarga qaramay, shifoxonada olamdan o‘tgan.
Hozirda ushbu holat bo‘yicha Yangiqo‘rg‘on tuman IIB tergov bo‘limi tomonidan tergovga qadar tekshiruv harakatlari olib borilmoqda.
Izoh (0)