Ijtimoiy tarmoqlarda foydalanilgan elektr energiyasining 200 kilovattdan ortgan qismi uchun 7,5 ming so‘mdan to‘lovlar amalga oshirilishi to‘g‘risida xabarlar tarqaldi. Energetika vazirligi mazkur holatga munosabat bildirib, buning mutlaqo yolg‘on ekanini ma’lum qildi.
Vazirlik iste’molchilardan bu kabi tasdiqlanmagan xabarlarga ishonmaslikni so‘ragan.
Ma’lum qilinishicha, ayni kunlarda aholi va iqtisodiy tarmoqlarini sifatli va uzluksiz elektr energiyasi hamda tabiiy gaz bilan ta’minlash maqsadida energetika sohasini isloh qilishga qaratilgan Vazirlar Mahkamasining “Yoqilg‘i-energetika resurslarining narxlari va tariflarini o‘zgartirish to‘g‘risida”gi qaror loyihasi ish jarayonida va hujjatning loyihasi muhokama uchun “Regulation.gov.uz”ga joylashtiriladi hamda barchaning fikr va takliflari ko‘rib chiqiladi.
“Shu bilan bir qatorda, ijtimoiy tarmoq adminlaridan bu kabi asossiz va tasdiqlanmagan xabarlarni tarqatganlik uchun tegishli qonunchilik hujjatlarida javobgarlik belgilanganligini eslatib o‘tamiz”, — deyiladi munosabatda.
Avvalroq energetika vaziri o‘rinbosari Sherzod Xo‘jayev “Daryo” nashriga bergan intervyusida O‘zbekistonda ishlab chiqarilayotgan va aholi xonadonlari uchun sotilayotgan elektr energiyasi davlatga moliyaviy zarar keltirayotganini ma’lum qilgandi. Uning so‘zlariga ko‘ra, aholi xonadonlari uchun bugungi kundagi mavjud tarif 1 kilovatt soat elektr energiyasi uchun 295 so‘mni tashkil etadi. Ishlab chiqarish va tashish xarajatlarining barchasi qo‘shilsa, xarajatlarimiz o‘rta hisobda 400 so‘mdan oshadi.
Izoh (0)