Шавкат Мирзиёев 27 май куни Евросиё иқтисодий иттифоқининг йиғилишида ташкилот ҳузуридаги кузатувчи давлат раҳбари сифатида иштирок этди. Бу ҳақда Президент матбуот хизмати хабар қилди.
Қайд этилишича, йиғилиш Қирғизистон президенти Садир Жапаров раислигида видеоанжуман шаклида ўтган. Тадбирда Россия президенти Владимир Путин, Беларусь президенти Александр Лукашенко, Қозоғистон президенти Қосим-Жўмарт Тўқаев, Арманистон бош вазири Никол Пашинян, Евросиё иқтисодий иттифоқи (ЁИИ) ҳузуридаги кузатувчи мамлакат — Куба президенти Мигел Бермудес ва Евросиё иқтисодий комиссияси ҳайъати раиси Михаил Мясникович ҳам қатнашган.
Йиғилиш кун тартибидан ЁИИ маконида ўзаро манфаатли ҳамкорликни ривожлантириш ва интеграция жараёнларини чуқурлаштириш, шу жумладан иқтисодиёт, савдо, саноат, транспорт ва бошқа йўналишларда амалий шерикликни мустаҳкамлаш масалалари ўрин олди. Шавкат Мирзиёев нутқининг аввалида Қирғизистон ЁИИга раисликни фаол амалга ошираётгани, бу ташкилот доирасидаги кўп қиррали ҳамкорликни кенгайтиришга хизмат қилаётганини қайд этган. Биргаликдаги саъй-ҳаракатлар билан пандемиянинг салбий оқибатлари юмшатилгани ҳамда мамлакатларимиз ўртасидаги савдо-иқтисодий ҳамкорликда ижобий суръат таъминланаётгани таъкидланган.
Президент Ўзбекистон ва ЁИИ мамлакатлари ўртасидаги савдода техник тўсиқларни бартараф этишни давом эттириш ва сертификатлаштиришни ўзаро тан олишга чақирган. Бу товарларнинг бозорларимизга кириб боришини анча соддалаштиришга хизмат қилади. Биргаликда қишлоқ хўжалиги экинларини етиштириш ва озиқ-овқат маҳсулотларини ишлаб чиқариш орқали агросаноат кооперациясини кенгайтириш алоҳида долзарб аҳамиятга эга экани таъкидланган. Бу борадаги натижадорликни ошириш мақсадида ҳудудлараро алоқаларни фаоллаштиришни назарда тутадиган Агрокооперация дастурини ишлаб чиқиш таклиф қилинган.
Ўзбекистон етакчиси муқобил транспорт йўлакларини ривожлантириш ҳамда Жануб ва Шарқ йўналишида транспорт жиҳатидан ўзаро боғлиқликни мустаҳкамлаш зарурлигига эътиборни қаратган. Шу муносабат билан Осиё—Тинч океани минтақаси бозорларига чиқиш учун қўшимча имкониятлар яратадиган Ўзбекистон—Қирғизистон—Хитой темир йўлини барпо этиш лойиҳасини амалга оширишни тез фурсатда бошлаш муҳим экани таъкидланган. Термиз шаҳридан Покистоннинг Пешовар шаҳригача Жанубий Осиё ва унинг икки миллиард нафар истеъмолчига эга бозорига чиқиш учун энг қисқа йўлни таъминлайдиган трансафғон темир йўлини қуриш лойиҳасини амалга оширишда ҳамкорлик қилишга тайёрлик билдирилган.
Иқтисодий тараққиётнинг табиий драйверига айланиши лозим бўлган туризм соҳасидаги саъй-ҳаракатларни бирлаштириш, шунингдек, мамлакатлар ўртасидаги йўловчи транспорти қатновини тўлиқ ҳажмда тиклаш зарурлигига алоҳида эътибор қаратилган. Давлат раҳбари Ўзбекистонда ЁИИ мамлакатларининг етакчи компаниялари иштирокида Туризм индустриясини ривожлантириш форумини ўтказиш таклифини илгари сурган.
Шавкат Мирзиёев ўз нутқининг якунида Ўзбекистоннинг мамлакатлар барқарор тараққиётини таъминлаш ва фаровонлигини юксалтириш мақсадида Евросиё иқтисодий иттифоқи билан ўзаро манфаатли ҳамкорлик ва кўп қиррали шерикликни изчил мустаҳкамлашга интилиши қатъий эканини яна бир бор тасдиқлаган.
«ТАСС»нинг хабар беришича, Ўзбекистон Евросиё иқтисодий иттифоқи билан кузатувчи мақомида шериклик муносабатларини ривожлантириш тарафдори. Мирзиёев йиғилишдаги нутқида бу ҳақда алоҳида тўхталиб ўтган.
«Ўзбекистон кузатувчи мақомида иттифоқ билан шериклик муносабатларини ривожлантиришда давом этади. Бу биз учун жуда муҳим, чунки ЁИИ мамлакатлари бизнинг асосий ҳамкорларимиз ҳисобланади
Мамлакатнинг ташкилот билан ўзаро манфаатли ҳамкорликни изчил ривожлантириш тарафдори эканини яна бир бор тасдиқламоқчиман. Ишончим комилки, бугунги учрашув натижалари кўп қиррали шерикликни янада мустаҳкамлаш, ЁИИ мамлакатларида барқарор иқтисодий ривожланишнинг ва Ўзбекистонда фаровонликнинг ўсишига хизмат қилади», — деган президент.
Аввалроқ Ўзбекистон Евросиё тараққиёт банкига аъзо бўлишга тайёрланаётгани, Ўзбекистон ЁИИнинг иқлим, рақамлаштириш ва логистика лойиҳаларига қўшилмоқчи экани хабар қилинганди.
Изоҳ (0)