Kasalliklarning oldini olish va nazorat qilish bo‘yicha Yevropa markazi (ECDC) tomonidan e’lon qilingan so‘nggi ma’lumotlarga ko‘ra, butun dunyo bo‘ylab maymunchechak bilan kasallanish holatlari 219 taga yetdi.
ECDC ma’lumotlariga ko‘ra, Yevropada kasallikning Afrikaga (kasallik endimik bo‘lgan qit’a) hech qanday epidemiologik aloqasi bo‘lmagan yuqish zanjirlari birinchi marta qayd etilgan.
May oyida maymunchechakning g‘ayrioddiy turi birinchi marta aniqlangan Buyuk Britaniyada hozir eng ko‘p bemor mavjud — 71 nafar.
Undan keyingi aksariyat bemorlar Ispaniya (51 nafar) va Portugaliyaga (37 nafar) to‘g‘ri kelmoqda. Yevropadan tashqarida Kanadada 15 kishida va AQSHda 9 kishida ushbu kasallik tasdiqlangan.
Mutaxassislarning ta’kidlashicha, virus kasallangan hayvonning tishlashi, qoni orqali yoki ularning go‘shtini iste’mol qilish bilan yuqadi. Boshlang‘ich alomatlar qo‘l va yuzda suvchechakka o‘xshash toshmalar paydo bo‘lishi va yuqori isitmadan iborat bo‘ladi.
Maymunchechakni davolash uchun qo‘llanadigan biror tibbiy vosita yo‘q, lekin simptomlar ko‘p hollarda ikki-to‘rt haftadan keyin yo‘qoladi va odatda o‘limga olib kelmaydi.
Jahon sog‘liqni saqlash tashkiloti maymunchechakning tarqalishi ommaviy emlashni talab qilmasligini, uni to‘xtatish mumkinligini ma’lum qilgan.
Belgiya va Germaniyada maymunchechak bilan kasallanganlar uchun 21 kunlik karantin joriy qilingan.
Izoh (0)