BMT Xavfsizlik kengashi KXDRga qarshi sanksiyalarni kuchaytirish to‘g‘risidagi rezolyutsiya loyihasini qabul qila olmadi. Xavfsizlik kengashi doimiy a’zolari Rossiya va Xitoy veto huquqidan foydalandi, qolgan mamlakatlar esa uni yoqlab ovoz berdi, deb yozadi “RBK”.
Rezolyutsiya qabul qilinishi uchun to‘qqizta ovoz va doimiy a’zolar tomonidan veto bo‘lmasligi talab etiladi. Xavfsizlik kengashining doimiy a’zolari Rossiya va Xitoydan tashqari, AQSH, Fransiya va Buyuk Britaniyadan iborat.
Loyiha AQSH tomonidan KXDR tomonidan uchirilgan ballistik raketalarga javoban tayyorlangan bo‘lib, u Shimoliy Koreyaga neft va neft mahsulotlari eksportining ruxsat etilgan hajmini qisqartirishga qaratilgan edi. Vashington, shuningdek, Pxenyanga mineral yonilg‘i va yog‘ eksportini taqiqlashni taklif qilgandi.
Rossiyaning BMT huzuridagi doimiy vakili Vasiliy Nebenzya o‘zi bergan qarshi ovozni izohlar ekan, Vashington Moskvaning mulohazalarini hisobga olmaganini aytdi. “Amerikalik hamkasblarimiz loyiha bo‘yicha maslahatlashuvlar chog‘ida bergan fikr-mulohazalarimizni e’tiborsiz qoldirganidan afsusdamiz”, — dedi u. Diplomatning fikricha, KXDRga qarshi sanksiyalarni kengaytirish “istiqbolsiz bo‘lish bilan birga, bunday choralar oqibatlari nuqtai nazaridan o‘ta xavfli hamdir”. Uning aytishicha, 2016—2017-yillarda qabul qilingan cheklovlar “birinchi navbatda oddiy shimoliy koreyaliklar hayotiga zarba bergan”.
“AQSH tomonidan taklif etilgan rezolyutsiya qandaydir muammolarni hal qila oladi, deb o‘ylamaymiz”, — deya ma’lum qildi BMTdagi Xitoy doimiy vakolatxonasi Reuters’ga. Xitoylik diplomatlar fikricha, Vashington Pxenyan bilan munosabatlarda o‘zgarishga erishmoqchi bo‘lsa, “ko‘proq samimiylik va moslashuvchanlik”ni namoyon qilishi kerak.
Eslatib o‘tamiz, AQSH prezidenti Jo Baydenning Seul va Tokioga tashrifi hamda Quad sammiti (Avstraliya, AQSH, Hindiston va Yaponiya ishtirokidagi xavfsizlik bo‘yicha to‘rt tomonlama muloqot)dan keyin KXDR Yapon dengiziga qarata uchta raketa uchirgan edi. Yaponiya buni Shimoliy Koreya tomonidan ochiq-oydin provokatsiya deb atadi.
Janubiy Koreya harbiylari KXDRning ushbu xatti-harakatlariga javoban, “Xenmu-2” ballistik raketalarini uchirdi, AQSH esa Yapon dengiziga qarata bitta ATACMS snaryadini uchirdi. Shu tariqa ittifoqchilar ittifoq kuchlari tomonidan “zudlik bilan zarba berilishi” imkoniyatlarini ko‘z-ko‘z qilgan.
Shundan keyin AQSH BMT Xavfsizlik kengashiga ballistik raketalar parvozi uchun Shimoliy Koreyaga nisbatan sanksiyalarni kuchaytirishni ko‘zda tutuvchi rezolyutsiya loyihasini kiritgan edi.
Izoh (0)