Pokistonning sobiq bosh vaziri va “Tehrik-i-Insaf” partiyasi rahbari Imron Xon hukumatga ultimatum qo‘ydi. Xon olti kun ichida parlamentni tarqatib yuborishni va muddatidan oldin saylovlar o‘tkazishni talab qilmoqda.
25-may kuni Pokiston poytaxti Islomobodda Imron Xon tarafdorlari norozilik namoyishi o‘tkazdi. Hukumat namoyishchilarning bir qismi kirmasligi uchun Islomobodga olib boruvchi yo‘llarni to‘sib qo‘ygan hamda shaharning asosiy hukumat binolari joylashgan “qizil zonasi”ga qo‘shinlarni kiritgan. Dastlab namoyishchilar norozilik belgisi sifatida o‘tirishni rejalashtirgan, ammo namoyishlar politsiya bilan to‘qnashuvga aylanib ketgan. Politsiya namoyishchilarni tarqatish uchun ko‘zni yoshlatuvchi gaz ishlatgan.
“Men hukumatga murojaat qilmoqchiman: olti kun ichida saylovlarni e’lon qiling. Parlamentni tarqatib yuboring va iyun oyida saylovlarni o‘tkazing”, — deya Imron Xonning so‘zlarini keltiradi AFP. Xon shartlari bajarilmasa, namoyishlar davom etishini aytgan.
Imron Xon 9-aprel kuni mamlakat parlamenti unga nisbatan ishonchsizlik votumini qabul qilganidan so‘ng lavozimidan chetlatilgan edi. Xon uni hukumatdan olib tashlash ortida AQSH rasmiylari turganini aytgan. Uning o‘rniga Shahboz Sharif saylandi. Xon Sharifni “Amerikaning quli” deb atadi.
Imron Xon 24-fevral kuni hukumat tashrifi bilan Moskvaga borganidan keyin Pokistonda siyosiy inqiroz kuchaygan edi.
Izoh (0)