Maymunchechak tarqalishini to‘xtatish mumkin — JSST
Jahon sog‘liqni saqlash tashkiloti (JSST) Afrikadan tashqarida maymunchechakning tarqalishi ommaviy emlashni talab qilmaydi, deb hisoblamoqda. Bu haqda Reuters xabar berdi.
Yevropa va Shimoliy Amerikadagi sog‘liqni saqlash idoralari virus endemik bo‘lgan Afrikadan tashqarida ushbu kasallikka chalinish bo‘yicha 100 dan ortiq tasdiqlangan holatlarni tekshirmoqda. Bu raqamlar ortishi kutilmoqda, biroq ekspertlarning ta’kidlashicha, aholi uchun umumiy xavf darajasi juda past.
“Biz virusning odamdan odamga yuqishini to‘xtatmoqchimiz. Virus endemik bo‘lmagan mamlakatlarda buni amalga oshirsa bo‘ladi”, — dedi JSST eksperti, amerikalik epidemiolog-infeksionist Mariya Van Kerxove.
Afrikadan tashqarida so‘nggi 50 yildagi eng yirik epidemiya bo‘lishiga qaramay, maymunchechak odamlar o‘rtasida osonlikcha tarqalmaydi va mutaxassislarning ta’kidlashicha, bu xavf koronavirus pandemiyasiga teng kelmaydi.
JSSTning Yevropadagi mintaqaviy byurosi Yuqori xavf patogenlari guruhi rahbari Richard Pebodi ham vaksinalar va virusga qarshi vositalar ta’minoti nisbatan cheklanganini aytdi. Kontaktlarni kuzatish va izolyatsiyaga olish kasallik tarqalishini nazorat qilishning asosiy choralari, dedi u. Shuningdek, u maymunchechak juda oson tarqaladigan virus emasligini va shu paytgacha jiddiy kasallik keltirib chiqarmaganini ta’kidladi. Maymunchechak bilan kurashish uchun ishlatiladigan vaksinalar, o‘z navbatida, salbiy ta’sirga ham ega bo‘lishi mumkinligi aytildi.
Avval maymunchechak bilan kasallanish holatlari Italiya, Shvetsiya, Ispaniya, Buyuk Britaniya, Portugaliya, AQSH, Kanada va Avstraliyada, Belgiya va Fransiyada qayd etilgani, JSST maymunchechak avj olishi tufayli favqulodda yig‘ilish o‘tkazgani to‘g‘risida xabar berilgandi.
Belgiya maymunchechak tufayli majburiy karantin joriy etgan birinchi davlat bo‘ldi.
O‘zbekiston Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Nurmat Otabekov O‘zbekistonda maymunchechak qayd etilmaganini ma’lum qildi.
