AOKAda o‘tkazilgan brifingda Dorivor o‘simliklar yetishtirish va qayta ishlash markazi direktori G‘ayrat Jo‘rayev markaz tomonidan 2022-yilda amalga oshirilgan va amalga oshiriladigan ishlar to‘g‘risida ma’lumot berdi.
Qayd etilishicha, 2022-yilda tizim o‘rmon xo‘jaliklari tomonidan 4984 gektar maydonda dorivor o‘simliklar plantatsiyalarini barpo etish rejalashtirilgan. 8555 tonna dorivor o‘simliklar xom-ashyosi tayyorlanadi.
Shuningdek, qo‘mita tizimdagi 54 ta davlat o‘rmon xo‘jaliklari tomonidan 195,1 gektar maydonda 8 turdagi (lavanda, rozmarin, mavrak, jambil, goji va boshqa) noyob dorivor o‘simliklarning tajriba plantatsiyalari barpo etilgan.
2022-yil bahor mavsumida qo‘mita tizimdagi 27 ta davlat o‘rmon xo‘jaliklari tomonidan 11.5 gektar maydonda noyob turdagi golubika, malina, smorodina dorivor o‘simliklarning onalik tajriba plantatsiyalari barpo etilgan.
Avvalroq O‘zbekistonda dorivor o‘simliklarni qayta ishlaydigan korxonalar uskuna, ehtiyot qismlar va xomashyo importida bojxona bojidan ozod qilinishi to‘g‘risida xabar berilgandi. Shuningdek, dorivor o‘simliklarni yetishtirishni kengaytirish bo‘yicha prezident farmoni va qarori qabul qilingani, Zangiota tumanida Tashkent Pharma Park innovatsion ilmiy-ishlab chiqarish farmatsevtika klasteri tashkil etilishi xabar qilingan.
Izoh (0)