Toshkentda sotib olingan telefonning sobiq egasiga tegishli intim rasmlar bilan uni shantaj qilib, pul undirmoqchi bo‘lgan ikki yigit qo‘lga olindi. Bu haqda poytaxt IIBB axborot xizmati xabar berdi.
Ma’lum qilinishicha, 20 yoshli B. o‘zining iPhone 11 Pro smartfonini sotish uchun internetga e’lon bergan. Shundan so‘ng, telefonga xaridorlar xaridorlar chiqqan. Ular telefonni xarid qilishga rozi bo‘lgan va uchrashib olingan. Telefonni topshirish vaqtida fuqaro B. pulni olib, undagi ma’lumotlarni o‘chirish uchun telefonni qaytarib berishni so‘raganida, 23 hamda 21 yoshli bo‘lgan ikki xaridor undagi ma’lumotlarni o‘zlari o‘chirib tashlashlarini aytgan.
Oradan bir kun o‘tib, V. ismli xaridor B.ga qo‘ng‘iroq qilgan va telefonda intim suratlarni topib olgani bildirib, 1,5 ming dollar bermasa, uni internetda sharmanda qilishini ma’lum qilgan.
Jabrlanuvchi buncha puli yo‘qligi, faqatgina 700 dollari borligini aytganida, ular bunga rozi bo‘lgan.
Shundan so‘ng fuqaro B. IIOga murojaat qilgan va xaridorlar B.dan pulni olayotgan vaqtida ushlangan. Holat bo‘yicha yigitlarga nisbatan Jinoyat kodeksining 165-moddasi (tovlamachilik) bilan jinoyat ishi qo‘zg‘atilgan.
Mazkur moddada ko‘rsatilgan qilmish uchun qonun uch yildan besh yilgacha ozodlikdan mahrum qilish tarzidagi jazoni nazarda tutadi.
Bundan oldin Namanganda tadbirkorlarni “shantaj” qilib, ulardan pul olib kelgan ayol ushlangani, Toshkentda qizning kiyimsiz holdagi videosini tarqatmaslik uchun undan 5 ming dollar talab qilgan shaxsga hukm o‘qilgani, Xorazmda Instagram’dagi obro‘sizlantiruvchi rasmlarni o‘chirish evaziga 5 ming dollar so‘ragan shaxs ushlangani to‘g‘risida xabar berilgandi.
Izoh (0)