Ko‘plab mamlakatlarda koronavirusga qarshi cheklovlarning bekor qilinishi pandemiya tugaganini anglatmaydi, dedi Jahon sog‘liqni saqlash tashkiloti (JSST) rahbari Tedros Adxanom Gebreyesus.
“Pandemiya tugadimi? Yo‘q, aniq yo‘q. Tushunaman, bu siz eshitishni xohlagan xabar emas va bu men sizlarga yetkazishni istagan xabar ham emas”, — dedi Gebreyesus Jahon sog‘liqni saqlash assambleyasi (JSSTning 194 ta davlat vakillaridan iborat direktiv organi) 75-sessiyasi ochilishida nutq so‘zlayotib.
Uning ta’kidlashicha, butun dunyo bo‘yicha kasallanish va o‘lim darajasining pasayishi, shuningdek, ko‘plab mamlakatlarda cheklovlarning bekor qilinishi katta progressdir, biroq “muammo hamma joyda hal qilinmagunicha, hech qayerda hal qilinmagan hisoblanadi”. JSST rahbari so‘zlariga ko‘ra, turli mintaqalardagi qariyb 70 ta mamlakatda kasallanish darajasi oshishda davom etmoqda, ayni vaqtda butun dunyoda koronavirusga olinayotgan testlar kamaymoqda.
Gebreyesus qo‘shimcha qilishicha, jami 57 ta mamlakat o‘z aholisining 70 foizdan ortig‘ini emlagan, ularning deyarli barchasi daromad darajasi yuqori bo‘lgan davlatlardir. U butun dunyo bo‘yicha shunday ko‘rsatkichlarga erishish uchun bor kuchi bilan harakat qilishga, shuningdek, 60 yoshdan oshganlarning 100 foizini, sog‘liqni saqlash xodimlarining 100 foizini va hamroh kasalliklari bo‘lgan odamlarning 100 foizini emlashga da’vat etdi.
Pandemiya boshidan buyon butun dunyo bo‘yicha qariyb 527,6 million kishi koronavirusga chalinib, 6,2 milliondan ortiq odam kasallik oqibatlaridan vafot etgan.
Qayd etish joiz, Shimoliy Koreyada so‘nggi bir kecha-kunduzda 167 mingdan ziyod kishi Pxenyan “bezgak” deb ataydigan kasallikka chalingan, bir kishi kasallik oqibatida vafot etgan.
Janubiy Koreyaning Yonhap agentligiga ko‘ra, KXDR hamon Janubiy Koreya va AQShning koronavirusga qarshi kurashda yordam berish haqidagi taklifiga javob qaytarganicha yo‘q.
Dunyo ekspertlari KXDRdagi “bezgak”ni COVID-19 deb hisoblamoqda.
Izoh (0)