Кўплаб мамлакатларда коронавирусга қарши чекловларнинг бекор қилиниши пандемия тугаганини англатмайди, деди Жаҳон соғлиқни сақлаш ташкилоти (ЖССТ) раҳбари Тедрос Адханом Гебрейесус.
«Пандемия тугадими? Йўқ, аниқ йўқ. Тушунаман, бу сиз эшитишни хоҳлаган хабар эмас ва бу мен сизларга етказишни истаган хабар ҳам эмас», — деди Гебрейесус Жаҳон соғлиқни сақлаш ассамблеяси (ЖССТнинг 194 та давлат вакилларидан иборат директив органи) 75-сессияси очилишида нутқ сўзлаётиб.
Унинг таъкидлашича, бутун дунё бўйича касалланиш ва ўлим даражасининг пасайиши, шунингдек, кўплаб мамлакатларда чекловларнинг бекор қилиниши катта прогрессдир, бироқ «муаммо ҳамма жойда ҳал қилинмагунича, ҳеч қаерда ҳал қилинмаган ҳисобланади». ЖССТ раҳбари сўзларига кўра, турли минтақалардаги қарийб 70 та мамлакатда касалланиш даражаси ошишда давом этмоқда, айни вақтда бутун дунёда коронавирусга олинаётган тестлар камаймоқда.
Гебрейесус қўшимча қилишича, жами 57 та мамлакат ўз аҳолисининг 70 фоиздан ортиғини эмлаган, уларнинг деярли барчаси даромад даражаси юқори бўлган давлатлардир. У бутун дунё бўйича шундай кўрсаткичларга эришиш учун бор кучи билан ҳаракат қилишга, шунингдек, 60 ёшдан ошганларнинг 100 фоизини, соғлиқни сақлаш ходимларининг 100 фоизини ва ҳамроҳ касалликлари бўлган одамларнинг 100 фоизини эмлашга даъват этди.
Пандемия бошидан буён бутун дунё бўйича қарийб 527,6 миллион киши коронавирусга чалиниб, 6,2 миллиондан ортиқ одам касаллик оқибатларидан вафот этган.
Қайд этиш жоиз, Шимолий Кореяда сўнгги бир кеча-кундузда 167 мингдан зиёд киши Пхеньян «безгак» деб атайдиган касалликка чалинган, бир киши касаллик оқибатида вафот этган.
Жанубий Кореянинг Yonhap агентлигига кўра, КХДР ҳамон Жанубий Корея ва АҚШнинг коронавирусга қарши курашда ёрдам бериш ҳақидаги таклифига жавоб қайтарганича йўқ.
Дунё экспертлари КХДРдаги «безгак»ни COVID-19 деб ҳисобламоқда.
Изоҳ (0)