Avvalroq Ukrainadagi urushni qo‘llab-quvvatlamaydigan Belarus va Rossiyaning minglab fuqarolari O‘zbekistonga ko‘chib o‘tgani haqida xabar berilgan edi.
Ularning aksariyati IT-mutaxassislaridir. Ko‘pchiligi IT Park’ning “Toshkent vasvasasi” relokatsiya (ko‘chish o‘tish) dasturidan foydalanishdi.
Ushbu dastur doirasida IT-Park O‘zbekistonda yetishmayotgan IT mutaxassislari va IT kompaniyalariga mamlakatga ko‘chib o‘tish va shu yerda ishlashni davom ettirishga yordam beradi.
IT Park direktori o‘rinbosari Bahodir Ayupovning so‘zlariga ko‘ra, so‘nggi ikki oy davomida IT parkda ikki ming IT xodim ro‘yxatdan o‘tgan, ularning 90 foizi Belarusdan. Bu haqda SmartPress xabar bermoqda.
Unga ko‘ra, IT Park vakillari aeroportda relokantlarni kutib olib, SIM-kartalarni topshirib, mehmonxonaga olib boradi; bolalarni maktab va bog‘chada ro‘yxatga olish, bank hisob raqamlarini ochishda yordam beradi.
Shuningdek, IT Park Toshkentda ikkita turar joy majmuasini sotib oldi va o‘zining rezidentlariga kvartiralarni ijaraga bermoqda. Yangi binolarda barcha sharoitlarga ega ikki xonali xonadon oyiga 500 dollar turadi. Bu ijara bozoridagi o‘rtacha narx.
Relokantlarning 95 foizi uchun bu O‘zbekistonga birinchi tashrifdir. Shu sababli, har hafta IT park ma’muriyati madaniy-ko‘ngilochar tadbirlarni o‘tkazmoqda: qadimiy shaharlarga va teatrga sayohatlar, birgalikda kechki ovqatlanishlar.
Biz ko‘plab relokantlar O‘zbekistonni oraliq davlat sifatida ko‘rishini tushunamiz. Lekin biz mamlakat PR’ni ustuvor vazifa qilib qo‘ydik, biz uchun O‘zbekiston haqidagi stereotiplar yo‘q bo‘lib ketishi muhim, — deydi Bahodir Ayupov.
U, shuningdek, O‘zbekistonning siyosiy betarafligini ta’kidlab, mamlakat Rossiya, Xitoy va boshqa davlatlar ta’siriga tushmasligini ta’kidladi.
Avvalroq O‘zbekistonga ko‘chib o‘tgan belaruslik IT mutaxassislar taassurotlari haqida xabar berilgan edi.
Izoh (0)