Ijtimoiy tarmoqlarda Shahrisabz tumanining G‘elon qishlog‘ida aholi MFY raisligiga saylov jarayonlaridan norozi ekani aytilgan video tarqaldi. Tuman hokimligi voqeaning saylov jarayoniga aloqasi yo‘qligini aytmoqda.
“Videotasvirga e’tibor berilsa, voqea qish oylarida bo‘lganligini bilish qiyin emas. Chunki aholining oyoq ostida va binolar tomida qalin qor bor. Aslida ushbu holat 2022-yilning 18-fevralida bo‘lib o‘tgan. O‘sha kuni ‘G‘elon’ MFY raisi Safarmurod Jabborovning mahalla aholisi oldida hisoboti tinglanishi rejalashtirilgan va videotasvirda fuqarolarning rais faoliyati bilan bog‘liq fikr-mulohazalari aks etgan. Mazkur holat vaqtida mahallada yashovchi fuqaro Guljahon Niyozova jamoat joyida asossiz, uyatli va haqoratli so‘zlarni ishlatgan. Unga nisbatan Ma’muriy javobgarlik to‘g‘risidagi kodeksining 40-moddasi (tuhmat), 183-moddasi (mayda bezorilik) moddalari bilan ish qo‘zg‘atilib Jinoyat ishlari bo‘yicha Shahrisabz tuman sudining 2022-yil 7-apreldagi qaroriga binoan jarima jazosi tayinlangan”, — deyiladi hokimlik rasmiy munosabatida.
Hokimlikning qo‘shimcha qilishicha, videotasvirda aks etgan jarayonning hozirda tumanda bo‘lib o‘tayotgan mahalla raislari sayloviga umuman aloqasi yo‘q.
“G‘elon’ MFYda mahalla raisi saylovi 2022-yilning 25-may kuni soat 14:00 da qishloq hududidagi sobiq kasb-hunar kolleji binosida bo‘lib o‘tishi rejalashtirilgan. Saylovi qonunda belgilangan tartibda o‘tkaziladi”, — deydi hokimlik axborot xizmati rahbari Bahodir Halimov.
Bahodir Halimovning tuman prokuraturasiga tayanib ma’lumot berishicha, “G‘elon” MFYdan mahalla raisligiga nomzodlardan norozilik mazmunidagi birorta ham ariza kelib tushmagan.
“OAV vakillari va blogerlar mamlakatimizdagi muhim siyosiy jarayonga – mahalla raislari sayloviga befarq bo‘lmaganlari quvonarli hol, albatta. Bu mamlakatimizda demokratiyaning mustahkamlanib borayotgani, so‘z erkinligining yanada qadr topayotgani, yurtimizdagi ijtimoiy-siyosiy jarayonlarga nisbatan jamoatchilik nazoratining ortayotganidan dalolat beradi. Ammo ana shunday dolzarb siyosiy jarayonda birozgina e’tiborsizlik sabab noto‘g‘ri axborot tarqatib qo‘yish xalqning siyosiy dunyoqarashlariga salbiy ta’sir etishi mumkinligini ham unutmaylik”, — deyiladi hokimlik mas’ullari axborotida.
Izoh (0)