Surxondaryo viloyati Termiz shahrida biologik faol qo‘shimcha mahsulotlarning nusxasini ishlab chiqarib sotayotgan yashirin sex aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Termiz shahar bo‘limi tomonidan tadbirkorlik subyektlarining huquqlarini himoya qilish yuzasidan tezkor tadbir o‘tkazilgan. Unda fuqaro S.M. o‘zining yashash xonadonida yashirin sex tashkil etib, xaridor J.ga 86 dona “Al-Hadaya” (150 ming so‘mdan) va 100 dona “Androgard” (250 ming so‘mdan) nomli mahsulotlarning nusxalarini firibgarlik yo‘li bilan 40 million so‘mga sotgan vaqtida ushlangan. Uning “Kattabog‘” mahallasi hududidagi xonadoni ko‘zdan kechirilganda u yerdan 152 turdagi har xil yog‘ mahsulotlari, bo‘sh idishlar, har xil yorliqlarni (etiketka) ishlab chiqarishda foydalanilgan noutbuk va rangli printer ashyoviy dalil sifatida olingan.
Holat yuzasidan 168-moddasi (firibgarlik), 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilgan. Hozirda tergov harakatlari o‘tkazilmoqda.
Avvalroq Samarqandda qo‘lbola usulda alkogol mahsulotlari tayyorlovchi sex borligi aniqlangani, Toshkentda qalbaki “Rollton” ishlab chiqaruvchi yashirin korxona topilgani, Zangiotada taniqli kompaniyaning kir yuvish kukunlarini qo‘lbola usulda tayyorlab sotayotgan shaxs ushlangani xabar qilingan.
- Buxoroda inson salomatligi uchun xavfli yog‘ mahsuloti ishlab chiqarish bilan shug‘ullangan yashirin korxona aniqlandi
- Qoraqalpog‘istonda qo‘lbola usulda “Qaratau” spirtli ichimligi ishlab chiqaradigan yashirin korxonalar faoliyatiga chek qo‘yildi
- Bulung‘urda noqonuniy faoliyat yuritayotgan spirtli ichimlik sexi borligi ma’lum bo‘ldi
Izoh (0)