Toshkentda Markaziy Osiyo mamlakatlarida eksport-import operatsiyalarini amalga oshirishning o‘ziga xos xususiyatlariga bag‘ishlangan seminar boshlandi

Bugun, 17-may kuni Toshkentdagi Lumiere mehmonxonasida “Tojikiston, Qirg‘iziston va Qozog‘iston Respublikasida eksport-import operatsiyalarini amalga oshirishning o‘ziga xos xususiyatlari” deb nomlangan seminar boshlandi.

Tadbir Ready4Trade — Central Asia loyihasi doirasida amalga oshirilmoqda. Mazkur loyiha transchegaraviy talablarning shaffofligini oshirish, regulyativ va protsessual to‘siqlarni bartaraf etish, transchegaraviy elektron tijoratni takomillashtirish, xalqaro savdoni kuchaytirish orqali Markaziy Osiyoning beshta davlatida mintaqalararo va xalqaro savdoni rivojlantirishga qaratilgan. Shuningdek, ayollar boshchiligidagi korxonalarning xalqaro savdoda ishtirok etish imkoniyatlarini kengaytirish ham asosiy maqsadlardan biri hisoblanadi.

Ready4Trade — Central Asia loyihasi Yevropa Ittifoqi tomonidan moliyalashtiriladi va Xalqaro savdo markazi (ITC) tomonidan milliy hamkorlar bilan birgalikda amalga oshiriladi.

Seminarda O‘zbekiston davlat bojxona qo‘mitasi, O‘zbekiston Investitsiyalar va tashqi savdo vazirligi, Qirg‘iziston, Tojikiston, Qozog‘iston va O‘zbekiston Bojxona brokerlari assotsiatsiyalari raislari, xususiy sektor vakillari ishtirok etmoqda.

Seminarning 1-kunida so‘zga chiqqan Qirg‘iziston Bojxona brokerlari assotsiatsiyasi raisi Ivan Geletyuk Yevrosiyo Iqtisodiy Ittifoqida bojxona qonunchiligi va bojxona ishini tartibga solish mavzusida so‘z yuritdi. Ma’lumki, Qirg‘iziston va Qozog‘iston mazkur Ittifoq a’zolari hisoblanishadi.

Geletyuk Yevrosiyo Iqtisodiy Ittifoqi tomonidan qabul qilingan bojxona bo‘yicha umumiy qoidalar haqida tushuntirish berdi. Mavzu yuzasidan yo‘llangan savollarga javob berib o‘tdi.

Tadbir yakuni bo‘yicha ishtirokchilar Bojxona qonunchiligi va qo‘shni davlatlarning tashqi iqtisodiy faoliyatini tartibga soluvchi qonun hujjatlari sohasidagi bilimlarini kengaytirish, tashqi savdo bitimlarini tuzish sohasida malaka oshirish, Markaziy Osiyo mintaqasida transchegaraviy savdolarni amalga oshirishning huquqiy asoslarini o‘rganib olish imkoniyatiga ega bo‘lishadi.

Seminar 19-mayga qadar davom etadi.