Rekonstruksiya ishlari uchun ajratilgan mahsulotlarni talon-toroj qilgan “Bekobodyo‘lindustriya” UK mansabdor shaxslariga nisbatan jinoyat ishi qo‘zg‘atildi. Bu haqda Davlat xavfsizlik xizmati xabar qildi.
Qayd etilishicha, DXX tomonidan olib borilgan tezkor-qidiruv tadbirlari natijasida noqonuniy holat aniqlangan. Unga ko‘ra, 2017-yilda Avtomobil yo‘llari qo‘mitasi tarkibidagi “O‘zyo‘lbutlash” Respublika ta’minot boshqarmasi unitar korxonasi tomonidan pudratchi “Bekobodyo‘lindustriya” unitar korxonasiga M-39 Toshkent—Termiz avtomobil yo‘lining Qashqadaryo viloyati hududidan o‘tuvchi 1265-1297 kilometrini qismini rekonstruksiya qilish uchun 1103,2 tonna yo‘lbop import bitum mahsuloti yetkazib berilgan.
Ajratilgan bitum mahsuloti qayd etilgan obyektga sarflanishi ko‘rsatilgan. Shunga qaramay, “Bekobodyo‘lindustriya” unitar korxonasining mansabdor shaxslari qurilish ishlarini yakuniga yetkazmasdan, 738,2 tonna bitumni boshqa korxonalarga 933 million so‘mga sotib yuborgan. Undan tushgan pul mablag‘larini maqsadsiz sarflab yuborgan.
Holat yuzasidan Transport prokuraturasi tomonidan “Bekobodyo‘lindustriya” UK mansabdor shaxslari va boshqalarga nisbatan Jinoyat kodeksining 205-moddasi (hokimiyat yoki mansab vakolatini suiiste’mol qilish) 2-qismi “a” bandi bilan jinoyat ishi qo‘zg‘atilgan. Hozirda tergov harakatlari olib borilmoqda.
Mavzuga doir:
Izoh (0)