Ижтимоий тармоқларда Шаҳрисабз туманининг Ғeлон қишлоғида аҳоли МФЙ раислигига сайлов жараёнларидан норози экани айтилган видео тарқалди. Туман ҳокимлиги воқеанинг сайлов жараёнига алоқаси йўқлигини айтмоқда.
«Видеотасвирга эътибор берилса, воқеа қиш ойларида бўлганлигини билиш қийин эмас. Чунки аҳолининг оёқ остида ва бинолар томида қалин қор бор. Аслида ушбу ҳолат 2022 йилнинг 18 февралида бўлиб ўтган. Ўша куни ‘Ғeлон’ МФЙ раиси Сафармурод Жабборовнинг маҳалла аҳолиси олдида ҳисоботи тингланиши режалаштирилган ва видеотасвирда фуқароларнинг раис фаолияти билан боғлиқ фикр-мулоҳазалари акс этган. Мазкур ҳолат вақтида маҳаллада яшовчи фуқаро Гулжаҳон Ниёзова жамоат жойида асоссиз, уятли ва ҳақоратли сўзларни ишлатган. Унга нисбатан Маъмурий жавобгарлик тўғрисидаги кодексининг 40-моддаси (туҳмат), 183-моддаси (майда безорилик) моддалари билан иш қўзғатилиб Жиноят ишлари бўйича Шаҳрисабз туман судининг 2022 йил 7 апрелдаги қарорига биноан жарима жазоси тайинланган», — дейилади ҳокимлик расмий муносабатида.
Ҳокимликнинг қўшимча қилишича, видеотасвирда акс этган жараённинг ҳозирда туманда бўлиб ўтаётган маҳалла раислари сайловига умуман алоқаси йўқ.
«‘Ғeлон’ МФЙда маҳалла раиси сайлови 2022 йилнинг 25 май куни соат 14:00 да қишлоқ ҳудудидаги собиқ касб-ҳунар коллежи биносида бўлиб ўтиши режалаштирилган. Сайлови қонунда белгиланган тартибда ўтказилади», — дейди ҳокимлик ахборот хизмати раҳбари Баҳодир Ҳалимов.
Баҳодир Ҳалимовнинг туман прокуратурасига таяниб маълумот беришича, «Ғeлон» МФЙдан маҳалла раислигига номзодлардан норозилик мазмунидаги бирорта ҳам ариза келиб тушмаган.
«ОАВ вакиллари ва блогерлар мамлакатимиздаги муҳим сиёсий жараёнга – маҳалла раислари сайловига бефарқ бўлмаганлари қувонарли ҳол, албатта. Бу мамлакатимизда демократиянинг мустаҳкамланиб бораётгани, сўз эркинлигининг янада қадр топаётгани, юртимиздаги ижтимоий-сиёсий жараёнларга нисбатан жамоатчилик назоратининг ортаётганидан далолат беради. Аммо ана шундай долзарб сиёсий жараёнда бирозгина эътиборсизлик сабаб нотўғри ахборот тарқатиб қўйиш халқнинг сиёсий дунёқарашларига салбий таъсир этиши мумкинлигини ҳам унутмайлик», — дейилади ҳокимлик масъуллари ахборотида.
Изоҳ (0)