O‘zbekistonda ishbilarmonlik muhiti qanday bo‘lmoqda?

O‘zbekistonlik tadbirkorlar qishloq xo‘jaligi sohasidagi ishbilarmonlik muhitini ijobiy baholadi. Bu haqda Iqtisodiy tadqiqotlar va islohotlar markazi matbuot xizmati “Daryo”ga ma’lum qildi.

Joriy yilning aprel oyida qishloq xo‘jaligida ishbilarmonlik muhitining umumiy ko‘rsatkichi bo‘yicha sezilarli o‘sish qayd etildi. Ko‘rsatkich mart oyiga nisbatan 10 punktga oshdi. 

Shu bilan birga, qishloq xo‘jaligida biznesning hozirgi kutish ko‘rsatkichining eng sezilarli o‘sishi 11 punkt bo‘ldi. Qishloq xo‘jaligi sektori xavf-xatar va shoklarga nisbatan eng barqaror xarakterga ega bo‘lib, hukumat tomonidan sohada olib borilayotgan islohotlar uning samaradorligini oshiradi.

Iqtisodiy tadqiqotlar va islohotlar markazi O‘zbekistondagi korxonalar o‘rtasida navbatdagi so‘rovnomani o‘tkazdi. Aprel oyida ikki yo‘nalish bo‘yicha o‘tkazilgan so‘rovda 1000 dan ortiq korxona ishtirok etdi.

Joriy yilning mart oyi bilan taqqoslaganda, ishbilarmonlik muhitining umumiy ko‘rsatkichi o‘zgarishsiz qoldi va 54 punktni tashkil etdi. Bu mamlakatdagi ishbilarmonlik muhitining holatini ijobiy deb baholaydi.

Tarmoqlar kontekstida ishbilarmonlik muhiti ko‘rsatkichi quyidagi bo‘ldi:

• qishloq xo‘jaligida — 61 punkt;
• xizmat ko‘rsatishda — 55 punkt (2022 yil mart oyida – 59 punkt); 
• qurilish sohasida — 51 punkt (2022 yil mart oyida – 56 punkt);  
• sanoatda – 48 punkt (2022 yil mart oyida – 50 punkt). 

O‘z biznesining hozirgi holatini yaxshi deb qayd etgan respondentlarning ulushi 33 foizni tashkil etdi. So‘nggi 3 oy ichida biznesning holati qanday o‘zgarganligi haqidagi savolga, tadbirkorlarning 32 foizi – yaxshilandi, 51 foizi – o‘zgarmadi va 17 foizi – yomonlashdi deb javob berdi.

41 foiz korxonalarda tovar va xizmatlarga bo‘lgan talab yaxshilandi, xodimlar soni esa 23 foiz korxonalarda oshdi.

Qishloq xo‘jaligidagi hozirgi holat ko‘rsatkichi 43 punktni, xizmat ko‘rsatishda – 34 punktni, sanoatda – 20 punktni va qurilishda – 34 punktni tashkil etdi.

Biznesni rivojlantirish istiqbollarini kutish ko‘rsatkichi 78 punktni tashkil etdi, bu esa tadbirkorlarning kelgusi 3 oy davomida biznesni rivojlantirish istiqbollari haqidagi umidlarini optimistik deb aks ettiradi.

Tadbirkorlarning 81 foizi o‘zlarining biznes istiqbollari yaxshilanishiga ishonishadi. 73 foiz korxonalarda tovar va xizmatlarga bo‘lgan talab yaxshilanishi, respondentlarning 65 foizi ishchilar sonining ko‘payishini kutmoqda.

Umuman olganda, mavjud vaziyat va istiqboldagi kutilmalar o‘rtasidagi bog‘liqlik shuni anglatadiki, tadbirkorlik sub’ektlarining taxminlariga ko‘ra, iqtisodiyotni ijobiy rivojlantirish tendensiyasi keyingi 3 oy ham davom etadi.

So‘rovda ishtirok etgan tadbirkorlar orasida 37 foiz tadbirkorlik faoliyatini rivojlantirishda hech qanday to‘siq yo‘qligini ta’kidladi.