Surxondaryo viloyatining Angor tumanida yerni talon-toroj qilinishi bilan bog‘liq jinoyat fosh etildi, deb xabar beradi Bosh prokuratura matbuot xizmati.
Ma’lum qilinishicha, Surxondaryo viloyati prokuraturasi tomonidan yer uchastkalarini talon-toroj qilinishi bilan bog‘liq holat yuzasidan tergovga qadar tekshiruv harakatlari o‘tkazilgan.
Aniqlanishicha, “A.I.” MCHJ rahbari R.F. tomonidan Angor tumani Mustaqillikning 10 yilligi massivi hududidagi “Saidnosirxon” fermer xo‘jaligi balansidagi 224-konturdagi 60,8 ball bonitetli sug‘oriladigan qishloq xo‘jaligi yer maydonida 4 gektar yer maydoni o‘rniga amalda 7,10 gektar yer maydonidan foydalanib kelgan. Natijada 3,10 gektar sug‘oriladigan qishloq xo‘jaligi yer maydonida o‘zboshimchalik bilan qurilish ishlarini amalga oshirilib, ushbu yer maydonining qishloq xo‘jalik foydalanishidan chiqishiga sabab bo‘lingan. Buning oqibatida davlat va jamiyat manfaatlariga 3,183 milliard so‘m zarar yetkazilgan.
Mazkur holat yuzasidan viloyat prokuraturasi tomonidan jinoyat ishi qo‘zg‘atilib, dastlabki tergov harakatlari olib borilmoqda.
Avvalroq Navoiy va Namangan viloyatlarida yer maydonlarini noqonuniy ravishda sotishga uringan shaxslar ushlangani, Samarqandda 78 gektar yerni rasmiylashtirib berish uchun 135 ming dollar so‘ragan Tadbirkorlikka ko‘maklashish markazi xodimi ushlangani, O‘zbekistonda to‘rt oyda 2,2 ming gektardan ortiq yer o‘zboshimchalik bilan egallangani to‘g‘risida xabar berilgandi.
Izoh (0)