O‘zbekistonda noqonuniy qurilish holatlari yuzasidan murojaatlarni onlayn qabul qilish imkoni yaratiladi

O‘zbekiston prezidentining davlat boshqaruvi sohasida korrupsiyaviy xavf-xatarlarni bartaraf etishga qaratilgan navbatdagi qarori qabul qilindi. Bu haqda Korrupsiyaga qarshi kurashish agentligi rahbari Akmal Burhonov ma’lum qildi.

Qarorga muvofiq, Korrupsiyaga qarshi kurashish agentligi hamkor idora va vazirliklar bilan birgalikda 2022-yilning oktabr oyiga qadar “Korrupsiyaga qarshi kurashish virtual platformasi” loyihasini ishga tushiradi.

Shuningdek, qaror bilan korrupsiyaga moyil bo‘lgan munosabatlarni bartaraf etish bo‘yicha kompleks chora-tadbirlar dasturi tasdiqlanib, unga ko‘ra:

• “Shaffof qurilish” milliy axborot tizimida fuqarolardan noqonuniy qurilish holatlari yuzasidan murojaatlarni onlayn qabul qilish imkoni yaratiladi;
• oliy ta’lim muassasalariga o‘qishga kirish uchun beriladigan imtiyozlarning ro‘yxati yagona hujjatda shakllantiriladi hamda ushbu imtiyozlarni umumiy kvotaga kiritmaslik to‘g‘risidagi qoida belgilanadi;
• oliy ta’lim muassasalarda talabalarni yotoqxona bilan ta’minlashning elektron tizimi joriy etiladi;
• avtobekatlarda tadbirkorlik obyektlarini joylashtirishga ruxsat berishning shaffof elektron mexanizmlari yaratiladi;
• tashqi reklama obyektlarini joylashtirish onlayn auksion tartibiga qat’iy rioya etgan holda amalga oshiriladi va jamoatchilik nazorati kuchaytiriladi.

Eslatib o‘tamiz, O‘zbekiston prezidentining 2019-yil sentabrdagi qaroriga muvofiq, Qurilish vazirligi faoliyatiga “Shaffof qurilish” milliy axborot tizimi joriy etilishi belgilangan edi. Qurilish vazirligi mutaxassislari tomonidan 2020-yil 1-avgustdan boshlab ushbu tizim Toshkent shahri va Toshkent viloyatida to‘liq ishga tushirilgan, 2021-yil boshidan mamlakatning boshqa hududlarini ham ushbu tizim bilan qamrab olish ko‘zda tutilgani aytilgan. 2020-yilning iyunida qurilish vazirligining yangi loyihalarga bag‘ishlangan tadbirida “Shaffof qurilish” milliy axborot tizimidagi quyi axborot tizimlari haqida ilk marta to‘liq ma’lumot berilgan.