Namangan viloyati hokimi Shavkat Abdurazzаqov boshchiligidagi delegatsiya hamkorlikni rivojlantirish, o‘zaro manfaatli shartnomalar imzolash maqsadida Avstriya poytaxti Venaga keldi. Bu haqda “Daryo” muxbiri Azizbek Abduvaliyev xabar bermoqda.
Delegatsiyaning UniCredit Bank Austria departamenti direktori Doris Pignitter bilan uchrashuvi bo‘lib o‘tdi. Avstriyaning eng yirik banki Namangan viloyatidagi loyihalarni moliyalashtirishga tayyor ekanini bildirdi.
Uchrashuv davomida qiymati 8,8 million yevro bo‘lgan Namangan kardiologiya markazini modernizatsiya qilish loyihasi bo‘yicha taqdimot o‘tkazildi. Shuningdek, bank vakillari bilan viloyat travmatologiya markazini modernizatsiya qilish bo‘yicha ham muzokaralar olib borildi.
Delegatsiyaning Avstriya nazorat banki (Österreichische Kontrollbank AG) rahbari, doktor Xelmut Berinkopf bilan uchrashuvi bo‘lib o‘tdi.
Tomonlar Namangandagi ijtimoiy loyihalarni imtiyozli kreditlar asosida moliyalashtirish bo‘yicha muzokaralar o‘tkazdi va dastlabki kelishuvlarga erishdi.
Shavkat Abdurazzaqov Venada Quyi Avstriya federal yeri vitse-gubernatori Yoxen Danninger boshchiligidagi rasmiylar bilan ham muzokaralar o‘tkazdi. Muzokaralar davomida ikki tomonlama munosabatlarni rivojlantirishga qaratilgan o‘zaro hamkorlik memorandumi imzolandi.
Kelgusida hududlar o‘rtasida savdo-iqtisodiy, ijtimoiy-madaniy, turizm va boshqa yo‘nalishlarda aloqalarni rivojlantirish maqsadida yo‘l xaritasi ishlab chiqiladi va hayotga tatbiq etiladi.
Namangan delegatsiyasining Avstriyaga safari davom etmoqda.
Izoh (0)