Prezidentning Afg‘oniston bo‘yicha maxsus vakili Ismatulla Irgashev 10-may kuni Rim shahrida Italiya hukumatining Afg‘oniston va Yaman bo‘yicha maxsus vakili Janfranko Petrutsella bilan muzokaralar o‘tkazdi. Bu haqda Tashqi ishlar vazirligi xabar qildi.
Qayd etilishicha, suhbat chog‘ida O‘zbekiston va Italiyaning afg‘on inqirozini tinch yo‘l bilan hal etish borasidagi sa’y-harakatlari, ushbu mamlakatga insonparvarlik va boshqa yordamlar ko‘rsatish masalalari muhokama qilingan.
Petrutsella O‘zbekistonning Afg‘oniston iqtisodiyotini tiklash va unga insonparvarlik yetkazishdagi sa’y-harakatlarini yuqori baholagan. Afg‘onistonda tinchlik va barqarorlikni o‘rnatishda Italiyaning O‘zbekiston tomoni bilan bundan keyin ham faol hamkorlik qilishga tayyorligini ma’lum qilgan.
Uchrashuvda Afg‘onistondagi mavjud vaziyat, mamlakatning yangi hukumati va gumanitar inqirozning oldini olishga nisbatan xalqaro hamjamiyatning umumiy pozitsiyasini ishlab chiqish yuzasidan fikr almashilgan.
Afg‘oniston masalasi bo‘yicha maslahatlashuvlarni davom ettirishdan O‘zbekiston va Italiyaning o‘zaro manfaatdorligi bildirilgan.
O‘zbekistonning Afg‘onistonga yuborgan insonparvarlik yordamlari
O‘zbekiston Afg‘onistonga insonparvarlik yordamini ilk bor 2021-yilning 14-sentabr kuni yuborgan. Un, turli oziq-ovqat mahsulotlari, birlamchi zarur tovarlar, dori-darmonlar, kiyim-kechak va poyabzallardan iborat 1300 tonna og‘irlikdagi yordam butun mamlakat bo‘ylab kam ta’minlangan afg‘on oilalariga tarqatilgan. Dekabr oyida esa O‘zbekistonning Afg‘onistonga yuborgan navbatdagi insonparvarlik yordamini topshirish marosimi bo‘lib o‘tgan. Unda O‘zbekiston prezidentining Afg‘oniston bo‘yicha maxsus vakili Ismatulla Irgashev hamda Surxondaryo viloyati hokimi To‘ra Bobolov boshchiligidagi mamlakat rasmiylari ishtirok etgandi. Ramazon munosabati bilan 30-aprel kuni O‘zbekiston afg‘on xalqiga navbatdagi insonparvarlik yordamini jo‘natdi. 58 ta vagondan iborat yordamning asosiy qismini un va bug‘doy tashkil qiladi.
Izoh (0)