Сурхондарёда қишлоқ хўжалиги ерларида қурилиш ишларини амалга ошириб, 3,1 млрд сўмдан ортиқ зарар етказган жамият раҳбари аниқланди

Сурхондарё вилоятининг Ангор туманида ерни талон-торож қилиниши билан боғлиқ жиноят фош этилди, деб хабар беради Бош прокуратура матбуот хизмати.

Маълум қилинишича, Сурхондарё вилояти прокуратураси томонидан ер участкаларини талон-торож қилиниши билан боғлиқ ҳолат юзасидан терговга қадар текширув ҳаракатлари ўтказилган.

Аниқланишича, «А.И.» МЧЖ раҳбари Р.Ф. томонидан Ангор тумани Мустақилликнинг 10 йиллиги массиви ҳудудидаги «Саидносирхон» фермер хўжалиги балансидаги 224-контурдаги 60,8 балл бонитетли суғориладиган қишлоқ хўжалиги ер майдонида 4 гектар ер майдони ўрнига амалда 7,10 гектар ер майдонидан фойдаланиб келган. Натижада 3,10 гектар суғориладиган қишлоқ хўжалиги ер майдонида ўзбошимчалик билан қурилиш ишларини амалга оширилиб, ушбу ер майдонининг қишлоқ хўжалик фойдаланишидан чиқишига сабаб бўлинган. Бунинг оқибатида давлат ва жамият манфаатларига 3,183 миллиард сўм зарар етказилган.

Мазкур ҳолат юзасидан вилоят прокуратураси томонидан жиноят иши қўзғатилиб, дастлабки тергов ҳаракатлари олиб борилмоқда.

Аввалроқ Навоий ва Наманган вилоятларида ер майдонларини ноқонуний равишда сотишга уринган шахслар ушлангани, Самарқандда 78 гектар ерни расмийлаштириб бериш учун 135 минг доллар сўраган Тадбиркорликка кўмаклашиш маркази ходими ушлангани, Ўзбекистонда тўрт ойда 2,2 минг гектардан ортиқ ер ўзбошимчалик билан эгаллангани тўғрисида хабар берилганди.