Namangan viloyatining Pop tumanida o‘rikning ertapishar navlarini xorijga eksport qilish boshlandi. Bu haqda “Daryo” muxbiri Azizbek Abduvaliyev xabar bermoqda.
Tumanda yillar mobaynida foydalanilmay kelingan yerlarda intensiv bog‘lar yaratilib, innovatsion texnologiyalar joriy etilgan va “Nuran uz” meva-sabzavotchilik klasteri faoliyati yo‘lga qo‘yilgan edi.
102 gektar maydonda 4 ta quduq qazilib, tomchilatib sug‘orish yo‘li bilan Ispaniyadan keltirilgan ertapishar, hosildor o‘rik, shaftoli va na’matak navlari ekildi.
“O‘rikning dastlabki hosilini yig‘ishtirib olishga ham ulgurdik. Hozirgacha Rossiya, Qirg‘iziston, Qozog‘iston, Birlashgan Arab Amirliklari va Janubiy Koreyaga 500 tonnadan oshiq o‘rik yuborildi”, — deydi mazkur klaster ta’sischisi Nurali Abdullayev.
Abdullayevning aytishicha, xorijga o‘rikning har bir kilosi o‘rtacha 2,5 dollardan sotilmoqda. Klaster tomonidan yana kamida 500 tonna o‘rik hosili olinishi rejalashtirilgan.
Ma’lumot uchun, prezident Shavkat Mirziyoyev 2020-yili Namangan viloyatiga tashrifini aynan ushbu klasterdan boshlagan va bu yerda olib borilayotgan ishlarga yuqori baho bergandi.
Izoh (0)