Kadastr agentligi tomonidan yer va kadastr nazorati yo‘nalishida 2022-yilning yanvaridan 1-mayiga qadar yer nazoratini amalga oshirish bo‘yicha olib borilgan nazorati tadbirlari natijasida jami 6 215 ta holatda 2 245,6 gektar yer o‘zboshimchalik bilan egallab olingani aniqlandi. Bu haqda AOKAda o‘tkazilgan brifingda Agentlik axborot xizmati rahbari Ne’mat Atamuratov ma’lum qildi.
Jumladan,
- qishloq xo‘jaligiga mo‘ljallangan yerlarda 2 543 ta holatda — 2 043,4 gektar;
- aholi punktlari yerlarida 2 910 ta holatda — 139,8 gektar;
- sanoat, transport, aloqa mudofaa va boshqa maqsadlarga mo‘ljallangan yerlarda 121 ta holatda — 2 gektar;
- tarixiy madaniy ahamiyatga molik yerlarda 4 ta holatda — 0,1 gektar;
- o‘rmon fondi yerlarida 23 ta holatda — 5,4 gektar;
- suv fondi yerlarida 69 ta holatda — 2,1 gektar;
- zaxira yerlarda 545 ta holatda — 52,8 gektarni tashkil etadi.
Ixtiyoriy ravishda bartaraf etilmagan o‘zboshimchalik bilan egallangan yer uchastkalarini qaytarish va ularda qurilgan imoratlarni buzdirish bo‘yicha sudlarga 1 984 ta holatda 254,2 gektar da’vo arizalar kiritilgan. Shundan 167 ta da’vo a’rizalar sudlar tomonidan qanoatlantirilib, majburiy ijroga qaratilgan.
Huquqbuzarlik holatida jinoyat alomatlari mavjud bo‘lgan 410 ta materiallar o‘rnatilgan tartibga muvofiq prokuratura organlariga kiritilgan.
Yer va kadastr nazoratini avtomatlashtirish, korrupsiya holatlarini oldini olish maqsadida yerga oid huquqbuzarliklarni aniqlashdan bartaraf etilgunga qadar monitoringini yurituvchi “E-yer nazorat” avtomatlashtirilgan axborot tizimi amaliyotga joriy etilib, 9 580 ta aniqlangan huquqbuzarliklar axborot tizimiga kiritilgan.
Olib borilgan nazorat tadbirlari davomida respublika bo‘yicha fuqarolar jami 406 ta holatda 7 824,3 gektar yer maydonlaridan maqsadsiz foydalanilganligi aniqlangan. 30 ta holatda 10,7 gektar yer maydonlari bo‘yicha sudlarga da’vo arizalari hamda 376 ta holatda 7 813,6 gektar yer maydonlari bo‘yicha mahalliy hokimliklarga taqdimnomalar kiritilgan. Shundan 28 ta holatda 196,8 gektar yer maydonlarining tuman hokimliklari zaxirasiga qaytarilishi ta’minlangan.
Bundan tashqari, respublikadagi mavjud 5 562 ta sun’iy baliqchilik xavzalarini xatlovdan o‘tkazib chiqish natijasi bo‘yicha hududlarda faoliyat yuritayotgan 38 ta fermer xo‘jaliklari tomonidan 204,46 gektar yer maydonlari o‘zboshimchalik bilan egallab olish, 303 ta holatda 5,48 gektar yer maydonlariga o‘zboshimchalik bilan imorat qurish hamda 1 334 ta holatda fermer xo‘jaliklarining 36 146 gektar yer uchastkasiga bo‘lgan huquqlari belgilangan tartibda Davlat ro‘yxatidan o‘tkazilmagani aniqlangan.
Izoh (0)