O‘zbekistonda ayrim davlat xizmatlari uchun to‘lovlar bekor qilingani natijasida aholining 7,6 mlrd so‘m mablag‘i tejaldi

AOKAda o‘tkazilgan brifingda Adliya vazirligi axborot xizmati rahbari Sevara O‘rinboyeva sohada amalga oshirilgan ishlar, raqamlar, o‘zgarishlar haqida ma’lumot berdi.

Qayd etilishicha, Adliya vazirligi tomonidan 518 ta normativ-huquqiy hujjat loyihalari huquqiy ekspertizadan o‘tkazilgan. Shundan 282 ta (54 foiz) loyihaga ijobiy xulosa berilgan. 131 ta (25 foiz) loyiha bo‘yicha qabul qilinishi maqsadga muvofiq emasligi to‘g‘risida xulosalar berib qaytarilgan.

Huquqiy ekspertiza uchun vazirlikka kelib tushgan qonunchilik hujjatlari loyihalariga 2 ming 90 ta (har bir loyihaga o‘rtacha 5 tadan) e’tiroz bildirilgan. Xususan:

• 1 ming 293 ta – amaldagi qonunchilikka zid;
• 244 ta – qonunchilik texnikasiga zid;
• 81 ta – korrupsiyaviy omillar mavjud;
• 16 ta – jamoatchilik muhokamasidan o‘tkazilmagan;
• 456 ta – boshqa taklif va e’tirozlar bildirilgan.

Adliya vazirligiga huquqiy ekspertiza uchun kelib tushgan qonunchilik hujjatlari korrupsiyaga qarshi ekspertizadan o‘tkazilgan. Natijada 163 ta loyihaga cheklist ilova qilinmagani va 74 ta loyihada 122 ta korrupsiyaviy omillar aniqlangan. Idoraviy hujjatlarga 307 ta e’tiroz bildirilgan.

Murojaatlar bilan ishlash va huquqni qo‘llash amaliyoti sohasida vazirlikka jami 40 ming 688 ta murojaatlar kelib tushgan. Murojaatlarning:

• 23 ming 344 tasi qanoatlantirilgan;
• 10 ming 444 tasiga huquqiy tushuntirish berilgan;
• 2 ming 767 tasi taalluqliligi bo‘yicha yuborilgan.

Adliya vazirligining ishonch telefonlariga 2022-yil 1-choragi davomida jami 17 ming 797 nafar jismoniy va yuridik shaxs tomonidan qo‘ng‘iroqlar qilingan. Shundan 16 ming 453 ta og‘zaki murojaatlarga malakali mutaxassislar tomonidan tegishli huquqiy maslahatlar berilgan. 1 ming 344 ta murojaat o‘rganish talab qilgani sababli ijroga qaratilgan.

Vazirlik tomonidan aniqlangan qonun buzilishi holatlari yuzasidan 13 ming 171 ta taqdimnoma kiritilgan. 2 million 501 ming nafar shaxs ma’muriy, 6 ming 776 nafar shaxs intizomiy javobgarlikka tortilgan. Shundan 95 nafar xodim bilan tuzilgan mehnat shartnomasi bekor qilingan.

Qonun buzilishi holatlari yuzasidan 13 ming 171 ta taqdimnoma kiritilgan. Sudlarga 102,6 milliard so‘mlik 9 ming 145 ta da’vo kiritilib, 89,2 milliard so‘mlik 8 ming 418 ta da’vo qanoatlantirilgan.

Monitoring natijasida jami 5 ming 112 ta qonunchilik hujjatlariga zid bo‘lgan hokim qarorlari qabul qilingani aniqlangan. Kiritilgan ta’sir choralariga asosan 2 ming 192 ta qaror bekor qilingan. 2 ming 303 tasiga kelgusida bunday qonun buzilishiga yo‘l qo‘ymaslik belgilangan. 617 ta qarorni bekor qildirish choralari ko‘rilmoqda.

Shuningdek, Yuridik xizmat ko‘rsatish markazlari tomonidan davlat organlarining 550 mingdan ortiq buyruq va 150 mingdan ortiq shartnoma loyihalari huquqiy ekspertizadan o‘tkazildi.

8 ta yangi davlat xizmatlari turi joriy qilingan. Ko‘rsatiladigan davlat xizmatlari soni 172 taga yetgan. DXM va FHDY organlari orqali aholiga 3 millionga yaqin xizmat ko‘rsatilgan. Yagona interaktiv davlat xizmatlari portali orqali 300 dan ortiq xizmatni interaktiv shaklda ko‘rsatish yo‘lga qo‘yilgan.

Aholiga yengillik yaratish maqsadida ayrim davlat xizmatlarini ko‘rsatish uchun to‘lovlar bekor qilingan. Buning natijasida yiliga qariyb 7,6 milliard so‘m mablag‘lar aholining o‘zida qolishi ta’minlangan.

Davlat idoralari tomonidan fuqarolar va tadbirkorlardan 35 ta hujjatni (ma’lumotnomalar) talab qilinishi bekor qilingan. Buning natijasida yiliga o‘rtacha 5 milliondan ortiq fuqaroning ovora bo‘lishiga barham beriladi. Ularning 60 milliard so‘mdan ortiq mablag‘i o‘zida qolishiga erishiladi.

Intellektual mulk obyektlarini huquqiy muhofaza qilish uchun jismoniy va yuridik shaxslar tomonidan topshirilgan 3 ming 656 ta talabnoma qabul qilingan. Ushbu talabnomalar bo‘yicha 3 ming 503 ta davlat ekspertizasi amalga oshirilib, 2 ming 932 ta intellektual mulk obyekti davlat reyestrida ro‘yxatga olingan.