Jizzax viloyati Zomin tumanining tog‘li hududlarida 4-may kuni kuzatilgan sel oqimlari to‘xtadi. Bu haqda Favqulodda vaziyatlar vazirligi xabar qildi.
Qayd etilishicha, kuchli yog‘ingarchilik oqibatida tumanning Peshag‘or, Achchi, Qang‘li va Sho‘rcha qishloqlaridan o‘tgan soylarda sel suvlari oqimi kuzatilgan. Sel suvlari Jizzax—Zomin avtomobil yo‘li ostida o‘rnatilgan quvurlarga sig‘masdan, ushbu yo‘lning 25, 26, 27-kilometrlari ustidan toshib o‘tgan.
Zudlik bilan Jizzax viloyati FVB rahbariyati va qutqaruv bo‘linmalari hodisa joyiga yetib borgan. Qutqaruvchilar tomonidan ikki nafar fuqaro sel oqimlaridan qutqarilgan. Hozirda ularning ahvoli yaxshi.
Ayni paytda sel oqimlari to‘xtagan. Avtomobil yo‘llari maxsus texnikalar yordamida sel qoldiqlaridan tozalanib, harakat tiklangan. Voqea joyida viloyat FVB rahbariyati boshchiligida 140 nafar qutqaruvchilar va 8 ta maxsus texnika, shuningdek, favqulodda vaziyatlarning oldini olish va bunday vaziyatlarda harakat qilish davlat quyi tizimiga kiruvchi tashkilotlarning 83 nafar shaxsiy tarkibi va 25 ta maxsus texnikasi sel oqibatlarini bartaraf etish bilan shug‘ullanmoqda.
Xodimlar tomonidan sel suvlari toshgan ko‘chalar, aholi xonadonlari o‘rganilmoqda. Sel qoldiqlari tozalanib, hovli va yerto‘lalarda to‘plangan suv maxsus texnikalar yordamida chiqarib tashlanmoqda.
Hodisa oqibatida jabrlanganlar yo‘q.
Avvalroq Jizzaxda sel oqizib ketgan 20 yoshli fuqaro qutqarilgani xabar qilingandi.
Eslatib o‘tamiz, “O‘zgidromet” 3—4-mayda Volgabo‘yi hududlaridan nam va nisbatan salqin havo massalari kirib kelishini ma’lum qilgandi. 3-may kuni kuchli yog‘ingarchilik sabab O‘zbekistonning ayrim hududlarida sel oqimlari va toshqin suvlari yuzaga keldi. Markaz xabariga ko‘ra, 5-may kuni ham tog‘oldi va tog‘li hududlarda sel-suv toshqin hodisalari yuzaga kelishi xavfi mavjud.
Izoh (0)