O‘zbekistondagi maktablarda faoliyat yurituvchi 504 ming o‘qituvchining 280 ming nafardan ortig‘i, ya’ni 56 foizining salohiyati talab darajasida emas. Bu haqda xalq ta’limi vaziri Baxtiyor Saidov o‘zining Telegram’dagi kanaliga yozib qoldirdi.
Bugungi tahlikali zamonda, O‘zbekiston kabi rivojlanayotgan davlatning taraqqiyoti va kelajagi sifatli ta’lim bilan, kelajak avlod bilan bog‘liq. Ta’lim sifatini, xususan, sifatli maktab ta’limini tashkil etish bir qator muhim omillarga bog‘liq ekanini tushunib turibmiz. Aynan shu yo‘nalishlar kelgusi 2-3 yilda e’tiborimizda bo‘ladi.Bundan oldin Xalq ta’limi vazirligi O‘zbekistonda 5 milliondan ortiq o‘quvchiga mo‘ljallangan maktablarda 6,2 million o‘quvchi ta’lim olayotganini ma’lum qilgandi. Sobiq xalq ta’limi vaziri Sherzod Shermatov bu masalaga to‘xtalib, 2025-yilga kelib maktablar sig‘imidagi holat juda qiyin ahvolga tushib qolishi mumkinligini bildirgan.Dastavval, maktabda ta’lim sifati, avvalo, shu maktabda ishlayotgan o‘qituvchilar sifati va saviyasiga bog‘liq. Zero, ta’lim sifati — o‘qituvchi sifatidan yuqori bo‘la olmaydi.
Bugungi kunda respublika maktablarida 504 ming nafar o‘qituvchilarimiz faoliyat yuritadi Ularning 280 ming nafardan ortig‘i, ya’ni 56 foiz o‘qituvchilarimizning salohiyati talab darajasida emas. Bu degani deyarli 3 millionga yaqin o‘quvchi-bolalarda yuqori malakali o‘qituvchidan ta’lim olish imkoniyati mavjud emas.
Shundan kelib chiqib, vazirlik birinchi galda maktablarda faoliyat yuritayotgan o‘qituvchilarning sifat tarkibini yaxshilash va ularning doimiy malakasini oshirish, ular uchun uzluksiz metodik yordam ko‘rsatish tizimini joriy etish bo‘yicha vazifalar belgilab olindi.
Mazkur vazifani amalga oshirish Xalq ta’limi vazirligi huzuridagi Abdulla Avloniy nomidagi ilmiy-tadqiqot institutiga katta ishonch va mas’uliyat bilan yuklagan. Institut va hududlardagi 14 ta markaz bu yo‘nalishdagi asosiy bo‘g‘in etib belgilangan.
Xabaringiz bo‘lsa kerak, 2022-yildan boshlab o‘qituvchilar malakasini oshirish tizimi uzluksiz kasbiy rivojlantirish tizimiga transformatsiya bo‘ldi. Endi o‘qituvchilar doimiy o‘z ustlarida ishlashlari hamda bilim va malakalarini oshirishlari talab etiladi. Shu bilan birga, o‘qituvchi o‘ziga qulay shaklda (onlayn yoki an’anaviy), istagan va qulay vaqtda (yil davomida yoki yiliga 1 hafta) va xohlagan joyda (platformada, markazda, nodavlat tashkilotda yoki OTMda) malaka oshirish imkoniyati ham yaratildi. Endi o‘qituvchi maxsus platforma orqali o‘z bilimlarini diagnostika qiladi hamda aniqlangan bilimdagi bo‘shliqlar asosida malaka oshiradi.
Har bir o‘qituvchining kasbiy rivojlanish dinamikasi platforma orqali doimiy monitoring qilib boriladi.Bir so‘z bilan aytganda o‘qituvchilarni uzluksiz kasbiy rivojlantirishning mexanizmi va infrastrukturasi shakllantirildi. Masalan faqat malaka oshirish hamda metodik yordam ko‘rsatishning mazmuni, ya’ni kontentida qoldi. Aynan shu masalada Xalqaro tashkilotlar va donorlar bilan hamkorlikni kuchaytirishimiz zarur, deb hisoblaymiz.
Baxtiyor Saidov, xalq ta’limi vaziri
Prezident Shavkat Mirziyoyev 2021-yil 12-may kuni o‘tkazilgan yig‘ilishda maktablardagi ahvol va muammolar haqida so‘z yuritgandi. “Maktablardagi ahvolni ko‘rsa, odam, tavba deb yuboradi”, — degan davlat rahbari.
Izoh (0)