Sirdaryoda yer maydonini fuqaroga uy-joy xonadonlarini qurish uchun sotayotgan shaxs qo‘lga olindi. Bu haqda “Yoshlar” telekanalining “Yangi davri” informatsion dasturida ma’lum qilindi.
Ma’lum qilinishicha, Bosh prokuratura huzuridagi departamentning Sirdaryo viloyati boshqarmasi Boyovut tuman bo‘limi hamda DXXning Sirdaryo viloyati boshqarmasi xodimlari tomonidan tezkor tadbir o‘tkazilgan. Tadbir davomida fuqaroga Guliston shahar hokimining qaroriga ko‘ra “Yangibozor” hududida joylashgan xususiy bolalar bog‘chasi va o‘quv markazi qurish uchun mo‘ljallangan yer maydonini uy-joy xonadonlari qurish uchun ajratib berishni va’da qilgan shaxs aniqlangan. U ushbu yer maydonini kadastr bo‘linmasida ishlovchi tanishlari orqali hujjatlarni rasmiylashtirish hamda notarial idora orqali fuqaro nomiga o‘tkazib berish evaziga 60 ming dollar so‘ragan.
Mazkur shaxs Guliston shahri hududida joylashgan viloyat tibbiyot birlashmasi oldida kelishilgan pulning 8 ming dollarini olgan vaqtida ushlangan. Holat yuzasidan Jinoyat kodeksining tegishli moddalari bo‘yicha jinoyat ishi qo‘zg‘atilgan.
Avvalroq Samarqandda tuman hokimining soxta qarori bilan qariyb 20 ming dollarga yer sotgan xo‘jalik rahbari aniqlangani, Navoiyda noqonuniy uy-joy qurish bilan shug‘ullangan jinoiy guruh a’zolari qo‘lga olingani to‘g‘risida xabar berilgandi.
Mavzuga doir:
- O‘zbekistonning 3 ta hududida fuqarolarga yer maydonlari olib berish uchun pul talab qilgan shaxslar ushlandi
- Toshkent viloyatida 2 gektar sug‘oriladigan yerni 500 ming dollarga rasmiylashtirib berishni va’da qilgan jamiyat rahbari ushlandi
- Namanganda kam ta’minlangan oilalarga ajratilgan 1 gektar yerni 80 mln so‘mga sotmoqchi bo‘lgan shaxs ushlandi
Izoh (0)