Жиззах вилояти Зомин туманининг тоғли ҳудудларида 4 май куни кузатилган сел оқимлари тўхтади. Бу ҳақда Фавқулодда вазиятлар вазирлиги хабар қилди.
Қайд этилишича, кучли ёғингарчилик оқибатида туманнинг Пешағор, Аччи, Қанғли ва Шўрча қишлоқларидан ўтган сойларда сел сувлари оқими кузатилган. Сел сувлари Жиззах—Зомин автомобиль йўли остида ўрнатилган қувурларга сиғмасдан, ушбу йўлнинг 25, 26, 27-километрлари устидан тошиб ўтган.
Зудлик билан Жиззах вилояти ФВБ раҳбарияти ва қутқарув бўлинмалари ҳодиса жойига етиб борган. Қутқарувчилар томонидан икки нафар фуқаро сел оқимларидан қутқарилган. Ҳозирда уларнинг аҳволи яхши.
Айни пайтда сел оқимлари тўхтаган. Автомобиль йўллари махсус техникалар ёрдамида сел қолдиқларидан тозаланиб, ҳаракат тикланган. Воқеа жойида вилоят ФВБ раҳбарияти бошчилигида 140 нафар қутқарувчилар ва 8 та махсус техника, шунингдек, фавқулодда вазиятларнинг олдини олиш ва бундай вазиятларда ҳаракат қилиш давлат қуйи тизимига кирувчи ташкилотларнинг 83 нафар шахсий таркиби ва 25 та махсус техникаси сел оқибатларини бартараф этиш билан шуғулланмоқда.
Ходимлар томонидан сел сувлари тошган кўчалар, аҳоли хонадонлари ўрганилмоқда. Сел қолдиқлари тозаланиб, ҳовли ва ертўлаларда тўпланган сув махсус техникалар ёрдамида чиқариб ташланмоқда.
Ҳодиса оқибатида жабрланганлар йўқ.
Аввалроқ Жиззахда сел оқизиб кетган 20 ёшли фуқаро қутқарилгани хабар қилинганди.
Эслатиб ўтамиз, «Ўзгидромет» 3—4 майда Волгабўйи ҳудудларидан нам ва нисбатан салқин ҳаво массалари кириб келишини маълум қилганди. 3 май куни кучли ёғингарчилик сабаб Ўзбекистоннинг айрим ҳудудларида сел оқимлари ва тошқин сувлари юзага келди. Марказ хабарига кўра, 5 май куни ҳам тоғолди ва тоғли ҳудудларда сел-сув тошқин ҳодисалари юзага келиши хавфи мавжуд.
Изоҳ (0)