Makronning inauguratsiyasi o‘tkaziladigan sana e’lon qilindi

Fransiya prezidenti Emmanuel Makronning inauguratsiya marosimi 7-may kuni Yelisey saroyida bo‘lib o‘tadi, deb yozmoqda The Local nashri.

Shundan so‘ng Fransiya rahbari ikkinchi muddatga rasman o‘z lavozimiga kirishadi. Makron 24-aprel kuni 58,55 foiz ovoz bilan qayta saylangan edi. Siyosatchining yangi vakolat muddati 14-maydan boshlanadi.

Inauguratsiya marosimi hokimiyatni topshirishni rasmiylashtiradi va Yelisey saroyida, tantanalar zalida bo‘lib o‘tadi. Boshqa ko‘plab mamlakatlardan farqli o‘laroq, Fransiya prezidentining inauguratsiyasida qasamyod qilinmaydi.

Xususan, Konstitutsiyaviy Kengash prezidenti Loran Fabius saylovning rasmiy natijalarini e’lon qiladi, so‘ngra prezident Milliy faxriy legionning grossmeysteri sifatida tan olinadi va uning ikkinchi muddati rasman boshlanadi.

Shundan so‘ng Makron nutq so‘zlaydi, keyin voqea sharafiga to‘pdan 21 marta o‘q uziladi, o‘tmishda bu an’anani ikkinchi muddatga saylangan prezidentlarning ayrimlari o‘tkazib yuborgan. Marosim bayroqlarni ko‘tarish va davlat madhiyasi bilan yakunlanadi.

Eslatib o‘tamiz, 25-aprel kuni Makron mamlakatdagi prezidentlik saylovlarida g‘alaba qozongan, uning raqibi Marin Le Pen mag‘lubiyatini tan olgan edi. Fransiyaning amaldagi rahbari g‘alabasi e’lon qilinganidan keyin mamlakatda norozilik namoyishlari boshlandi. Boz ustiga, saylovchilar bilan uchrashuvda Makronga pomidor uloqtirishdi.