Shimoliy Koreya Yapon dengizi tomon ballistik raketaga o‘xshash raketani uchirdi, deya xabar bermoqda Yonhap agentligi Janubiy Koreya shtab boshliqlari qo‘mitasining bayonotiga tayanib.
“Rasmiylar raketaning uchish masofasi va balandligini tahlil qilmoqda, uning ballistik raketaga o‘xshashligi masalasi ko‘tarilmoqda”, — deyiladi xabarda.
Keyinroq Reuters agentligi Yaponiya qirg‘oq qo‘riqlash xizmatiga tayanib, noma’lum raketa dengizga qulagani haqida xabar berdi.
Bundan 18 kun avval, KXDR ikkita “yangi taktik boshqariladigan raketalarni” uchirgandi, deb eslatdi agentlik.
Yil boshidan beri KXDR bir necha bor raketa sinovlarini o‘tkazgan. Xususan, mart oyida mamlakat yetakchisi Kim Chen Inning shaxsiy rahbarligida yangi Hwasong-17 qit’alararo ballistik raketasi muvaffaqiyatli sinovdan o‘tkazilgani haqida xabar berilgandi. Keyinroq Shimoliy Koreya navbatdagi “yangi taktik boshqariladigan qurol” muvaffaqiyatli sinovdan o‘tkazilgani haqida ma’lum qildi, Seul buni Rossiyaning “Iskandar” raketalar majmuasiga o‘xshash yangilangan KN-23 raketalari deb atadi.
Mart oyi oxirida Kim Chen In mamlakatni faqat keng ko‘lamli hujum qurollari himoyalay olishini aytib, KXDR yanada kuchli qurollarni ishlab chiqishi va armiyani qurollantirishda davom etishiga va’da bergandi. Pxenyan, shuningdek, Seulning harbiy harakatlariga javoban yadro qurolidan foydalanish bilan tahdid qildi; Shu bilan birga KXDR Janubiy Koreya bilan urushga qarshi ekanini va uni dushman deb hisoblamasligini bildirgan.
Izoh (0)