2022-yil mart oyida AQSHda biryo‘la ikkita rekord o‘rnatildi — ishdan bo‘shagan xodimlar va yangi ochilgan ish o‘rinlari soni keskin ortib ketdi. Bu haqda AQSH mehnat bozori statistikasi byurosi ma’lumot bergan.
Byuro ma’lumotlariga ko‘ra, ish beruvchilar mamlakat miqyosida 11,5 million yangi vakansiyalar haqida e’lon bergan va bu statistika yuritilib kelinayotgan davr mobaynida kuzatilgan eng yuqori ko‘rsatkich. Mazkur yo‘nalish statistikasi 2000-yil dekabr oyidan beri yuritib kelinadi. AQSHda har bir ishsizga o‘rtacha ikkitadan bo‘sh ish o‘rni to‘g‘ri keladi. Mart oyida 4,5 million nafar odam ishga yollangan, fevral oyidagi statistika ham deyarli shu raqamlarni ko‘rsatgan.
Mart oyi yakunlari bo‘yicha 6,7 million xodim ishdan bo‘shagan, bu fevraldagi raqamlardan 400 mingtaga ko‘p. Shundan 4,5 million amerikalik ishchi o‘z xohishiga ko‘ra bo‘shagan. Bu mamlakatda kattaroq maosh olish umididagi va bunga ishonchi kuchli nomzodlar rekord darajada ko‘payganini anglatadi.
Izoh (0)