Rossiya bosqini tugaganidan keyin Ukraina iqtisodiyoti va infratuzilmasini tiklash uchun o‘rtacha 600 milliard dollar kerak bo‘ladi, dedi mamlakat prezidenti Vladimir Zelenskiy The Wall Street Journal tomonidan tashkil etilgan ijrochi direktorlar sammitida.
“Ishonchim komilki, g‘alabadan keyin biz hammasini tezda amalga oshiramiz, Ukraina avvalgidan ham go‘zalroq bo‘ladi”, — dedi Zelenskiy.
Bundan tashqari, Zelenskiy xorijiy kompaniyalarni jalb qiladigan sarmoyaviy muhit yaratishga va’da berdi. “Siz bizning mamlakatimizga, 40 milliondan ortiq bozorimizga kirishingiz mumkin bo‘ladi”, — dedi Ukraina prezidenti.
600 millard dollarlik summa haqida birinchi bo‘lib Ukraina bosh vaziri Denis Shmigal gapirgan. Uning ta’kidlashicha, bu mablag‘ uzoq muddatda iqtisodiyot va infratuzilmani tiklash uchun zarur bo‘ladi.
Avvalroq Ukraina rasmiylari Rossiya bankining sanksiyalar sabab muzlatib qo‘yilgan xorijiy mablag‘lari mamlakatni tiklash uchun ishlatilishi mumkinligini bir necha bor ta’kidlagan edi. Ukraina Iqtisodiyot vazirligi ularning hajmini 415 milliard dollarga baholagan va G‘arbdagi hamkorlaridan bu pullarni Kiyev foydasiga musodara qilish mexanizmini ishlab chiqishni so‘ragan. Rossiya moliya vaziri Anton Siluanovga ko‘ra, G‘arb Rossiya Markaziy bankining xorijdagi 640 milliard dollarlik zahiralaridan 300 milliardga yaqinini muzlatib qo‘ygan.
Shmigalning so‘zlariga ko‘ra, hozir Kiyevga oyiga 4 milliard dollardan 5 milliard dollargacha mablag‘ zarur, Kiyev Jahon banki, XVF va G20 bilan muzokaralar olib bormoqda. Gap, birinchi navbatda, Ukrainadagi ichki ko‘chirilganlarga insonparvarlik yordami haqida ketmoqda, ularning soni 7 millionga yaqin, dedi Ukraina bosh vaziri. Zelenskiyning o‘zi mamlakatga oyiga 7 milliard dollar kerak bo‘lishini aytgan. Uning so‘zlariga ko‘ra, bu mablag‘ nafaqat mamlakatni tiklash, balki ish haqini to‘lash va fuqarolar oldidagi ijtimoiy majburiyatlarni bajarish uchun ham zarur.
Shu bilan birga Jahon banki Rossiya bosqini oqibatida Ukrainaga yetkazilgan zararni 60 milliard dollarga baholagan edi. Bank prezidenti Devid Malpassning ta’kidlashicha, bu iqtisodiy xarajatlarni o‘z ichiga olmaydigan dastlabki hisob, u infratuzilma va binolarning vayron bo‘lishi natijasida yetkazilgan zararni nazarda tutadi. Janglar davom etar ekan, qurbonlar ortadi, deya qo‘shimcha qilgan u.
Izoh (0)