Yevropa Komissiyasi rahbari Ursula fon der Lyayen Rossiyaga qarshi yangi sanksiyalar paketini e’lon qildi.
Paket doirasida Yevropa Ittifoqi Rossiya neftining importiga taqiq qo‘yadi, “Sberbank” va yana ikki yirik Rossiya banki SWIFT’dan uziladi.
Bundan tashqari, Yevropa Ittifoqi hududida Rossiyaning uchta yirik telekanalini translyatsiya qilish taqiqlanadi (fon der Lyayen aynan qaysi kanallar ekaniga aniqlik kiritmagan).
Yevrokomissiya rahbari, shuningdek, yangi shaxsiy sanksiyalarni ham e’lon qildi, xususan, YI ma’lumotlariga ko‘ra, Buchada tinch aholining o‘ldirilishida ishtirok etgan yuqori martabali zobitlar “qora ro‘yxat”ga kiritilgan.
AFP hujjat loyihasiga tayanib, rus pravoslav cherkovining yepiskopi patriarx Kirillga ham shaxsiy sanksiyalar qo‘llanilishi haqida xabar bermoqda.
Yevropa Ittifoqining yangi sanksiyalari Ukrainada urush boshlanganidan beri joriy qilingan oltinchi sanksiyalar paketi bo‘ladi. Sanksiyalar kuchga kirishi uchun ular Yevropa Ittifoqining barcha 27 davlati elchilari tomonidan tasdiqlanishi kerak. BBC ma’lumotlariga ko‘ra, bu bir necha kunga cho‘zilishi ham mumkin.
Izoh (0)