AQSH Kongressining vakillar palatasi Ukrainaga lend-liz dasturi doirasida tezlashtirilgan tartibda qurol yetkazib berishga ruxsat beruvchi qonun loyihasini ma’qulladi. Kongress quyi palatasining 417 a’zosi bu qarorni yoqlab, 10 nafari qarshi ovoz bergan.
Aprel oyi boshida qonun loyihasi Kongressning yuqori palatasi — Senat tomonidan qo‘llab-quvvatlangan edi, endi hujjatni AQSH prezidenti Jo Bayden imzolashi kerak.
Lend-liz dasturi Ikkinchi jahon urushi paytida yaratilgan bo‘lib, u AQSHga ittifoqchilariga qurol, oziq-ovqat va strategik xomashyoni uzoq muddatli qarzga va tezroq jo‘natish imkonini bergan. 1941-yil martidan 1945-yil avgustigacha Qo‘shma Shtatlar ittifoqchilarga umumiy qiymati 50 milliard dollardan ortiq lend-liz yordamini o‘tkazgan, shundan taxminan 11 milliard dollari SSSRga to‘g‘ri kelgan.
Qonun loyihasi Senatga 2022-yilning yanvarida, Rossiyaning Ukrainaga bosqini boshlanishidan bir oy oldin, Rossiya hujumga tayyorlanayotgani haqidagi xabarlar fonida taqdim etilgandi. 6-aprel kuni senatorlar qonun loyihasini qabul qildi va uni vakillar palatasiga o‘tkazdi.
Qonun loyihasiga muvofiq Qo‘shma Shtatlar Ukrainaga uskunalarni hozirdanoq jo‘natishi, Ukraina ularning haqini keyinroq to‘lashi mumkin.
Ukraina prezident ofisining rahbari Andrey Yermak qonun qabul qilingandan keyin, Amerika rahbari 60 kun ichida tezlashtirilgan ta’minot tartib-qoidalarini o‘rnatishi kerakligini ta’kidlagan. “Lend-liz qonuni AQSHdan Ukrainaga qurol, transport, oziq-ovqat va yordam yetkazib berishni sezilarli darajada tezlashtirish imkonini beradi”, — deb yozgan u Telegram-kanalida.
Pentagon ma’lumotlariga ko‘ra, Vashington Kiyevga xavfsizlik bo‘yicha ikki oy davomida 3,4 milliard dollarga yaqin yordam ko‘rsatdi. 22-aprel kuni Bayden ma’muriyati Ukrainaga 800 million dollarlik yangi harbiy yordam paketini e’lon qildi. Ikki kundan keyin Pentagon rahbari Lloyd Ostin va AQSH Davlat kotibi Entoni Blinken Kiyevga tashrif buyurdi va Ukraina prezidenti Vladimir Zelenskiy bilan uchrashuvda mamlakat mudofaasi uchun 322 million dollardan ortiq mablag‘ ajratishni va’da qildi.
28-aprel kuni Bayden Kongressdan xuddi shu maqsadlar uchun yana 33 milliard dollar ajratishni so‘radi: 20 milliard dollar qurol-yarog‘ va harbiylar ta’minotiga sarflanadi, shuningdek, boshqa harbiy texnikalar xaridi va olib kelinishi uchun ishlatiladi, 8,5 milliard dollar to‘g‘ridan to‘g‘ri iqtisodiy ko‘mak, 3 milliard dollar esa gumanitar yordam va oziq-ovqat xavfsizligini ta’minlashga yo‘naltiriladi.
Avvalroq Rossiyaning AQSHdagi elchisi Anatoliy Antonov Moskva Vashingtonga nota yo‘llab, Kiyevga qurol berishni to‘xtatishni talab qilganini, chunki bu “mojaroga diplomatik yechim topishga hissa qo‘shmasligi”ni aytgandi. Oq uy esa Rossiyaning talabini “quruq tahdid” deb atagan.
Izoh (0)