28-aprel kuni kechqurun Kiyev markazi o‘qqa tutildi. Shahar meri Vitaliy Klichko shaharning Shevchenko tumaniga ikkita raketa urilganini ma’lum qildi. O‘z navbatida, Ukraina Ichki ishlar vazirligi rahbari maslahatchisi Anton Gerashenko Lukyanovka tumani ham o‘qqa tutilganini aytdi.
Shevchenko tumanining o‘qqa tutilishi oqibatida uch kishi jarohat olgan, ular kasalxonaga yotqizildi, dedi Vitaliy Klichko. Anton Gerashenko esa Lukyanovka tumanida olti nafar yarador borligini aytdi. Ukraina favqulodda vaziyatlar davlat xizmati raketa zarbasi tufayli 25 qavatli turar joy binosida yong‘in chiqqanini ma’lum qildi. Unga ko‘ra, birinchi va ikkinchi qavatlar shikastlangan, 10 kishi jarohatlangan, besh kishi qutqarib olingan.
Ukraina prezidenti ofisi maslahatchisi Mixail Podolyakning qayd etishicha, Kiyevdagi portlashlar shaharga BMT bosh kotibi Antoniu Gutterishning tashrifi chog‘ida sodir bo‘lgan.
“Kecha u (Gutteresh) Kremldagi uzun stol atrofida o‘tirgandi, bugun esa undan bir kilometr narida portlash sodir bo‘lmoqda. Bu Moskvadan salomlarmi? Nega Rossiya hali ham BMT Xavfsizlik kengashida o‘rin egallab turibdi?”, — deb yozgan Podolyak Twitter’da. BMT Bosh kotibi idorasi uning Kiyevda, xavfsiz holatda ekanini ma’lum qildi.
Davlat Favqulodda vaziyatlar xizmati vakili, shuningdek, Kiyev viloyatidagi “infratuzilma obyektlari” o‘qqa tutilgani haqida ham xabar bergan. Buning oqibatlari o‘rganilmoqda.
Bundan tashqari, OAV Odessada bir nechta portlashlar sodir bo‘lganini xabar qildi. Odessa viloyati harbiy boshqarmasi rahbari Maksim Marchenko Ukraina havo hujumidan mudofaa kuchlari Odessa viloyati osmonida uchta raketani urib tushirganini aytdi.
Izoh (0)