АҚШ Конгрессининг вакиллар палатаси Украинага ленд-лиз дастури доирасида тезлаштирилган тартибда қурол етказиб беришга рухсат берувчи қонун лойиҳасини маъқуллади. Конгресс қуйи палатасининг 417 аъзоси бу қарорни ёқлаб, 10 нафари қарши овоз берган.
Апрель ойи бошида қонун лойиҳаси Конгресснинг юқори палатаси — Сенат томонидан қўллаб-қувватланган эди, энди ҳужжатни АҚШ президенти Жо Байден имзолаши керак.
Ленд-лиз дастури Иккинчи жаҳон уруши пайтида яратилган бўлиб, у АҚШга иттифоқчиларига қурол, озиқ-овқат ва стратегик хом ашёни узоқ муддатли қарзга ва тезроқ жўнатиш имконини берган. 1941 йил мартидан 1945 йил августигача Қўшма Штатлар иттифоқчиларга умумий қиймати 50 миллиард доллардан ортиқ ленд-лиз ёрдамини ўтказган, шундан тахминан 11 миллиард доллари СССРга тўғри келган.
Қонун лойиҳаси Сенатга 2022 йилнинг январида, Россиянинг Украинага босқини бошланишидан бир ой олдин, Россия ҳужумга тайёрланаётгани ҳақидаги хабарлар фонида тақдим этилганди. 6 апрель куни сенаторлар қонун лойиҳасини қабул қилди ва уни вакиллар палатасига ўтказди.
Қонун лойиҳасига мувофиқ Қўшма Штатлар Украинага ускуналарни ҳозирданоқ жўнатиши, Украина уларнинг ҳақини кейинроқ тўлаши мумкин.
Украина президент офисининг раҳбари Андрей Ермак қонун қабул қилингандан кейин, Америка раҳбари 60 кун ичида тезлаштирилган таъминот тартиб-қоидаларини ўрнатиши кераклигини таъкидлаган. «Ленд-лиз қонуни АҚШдан Украинага қурол, транспорт, озиқ-овқат ва ёрдам етказиб беришни сезиларли даражада тезлаштириш имконини беради», — деб ёзган у Telegram-каналида.
Пентагон маълумотларига кўра, Вашингтон Киевга хавфсизлик бўйича икки ой давомида 3,4 миллиард долларга яқин ёрдам кўрсатди. 22 апрель куни Байден маъмурияти Украинага 800 миллион долларлик янги ҳарбий ёрдам пакетини эълон қилди. Икки кундан кейин Пентагон раҳбари Ллойд Остин ва АҚШ Давлат котиби Энтони Блинкен Киевга ташриф буюрди ва Украина президенти Владимир Зеленский билан учрашувда мамлакат мудофааси учун 322 миллион доллардан ортиқ маблағ ажратишни ваъда қилди.
28 апрель куни Байден Конгрессдан худди шу мақсадлар учун яна 33 миллиард доллар ажратишни сўради: 20 миллиард доллар қурол-яроғ ва ҳарбийлар таъминотига сарфланади, шунингдек, бошқа ҳарбий техникалар хариди ва олиб келиниши учун ишлатилади, 8,5 миллиард доллар тўғридан-тўғри иқтисодий кўмак, 3 миллиард доллар эса гуманитар ёрдам ва озиқ-овқат хавфсизлигини таъминлашга йўналтирилади.
Аввалроқ Россиянинг АҚШдаги элчиси Анатолий Антонов Москва Вашингтонга нота йўллаб, Киевга қурол беришни тўхтатишни талаб қилганини, чунки бу «можарога дипломатик ечим топишга ҳисса қўшмаслиги»ни айтганди. Оқ уй эса Россиянинг талабини «қуруқ таҳдид» деб атаган.
Изоҳ (0)