AQSH prezidenti Jo Bayden kongressga Ukrainani qo‘llab-quvvatlash uchun 33 milliard dollar ajratish yuzasidan murojaat qildi. Bu haqda AQSH prezidenti administratsiyasidagi manbasiga tayanib Reuters xabar bergan. Keyinroq AQSH prezidenti Oq uyda mazkur qarori haqida bayonot qildi.
“Mazkur qonun loyihasi Ukrainani erkinlik kurashida qo‘llab-quvvatlashimiz uchun kerak. Ushbu kurashning tovoni arzon emas, lekin zo‘ravonlikka taslim bo‘lishning qiymati yanada qimmat”, — deyiladi Baydenning bayonotida.
Umumiy mablag‘ning 20 milliard dollari qurol-yarog‘ va harbiylar ta’minotiga sarflanadi, shuningdek, boshqa harbiy texnikalar xaridi va olib kelinishi uchun ishlatiladi, 8,5 milliard dollar to‘g‘ridan to‘g‘ri iqtisodiy ko‘mak, 3 milliard dollar esa gumanitar yordam va oziq-ovqat xavfsizligini ta’minlashga yo‘naltiriladi.
“Bu ukrainalik harbiylar va politsiyaga tezkor ravishda zarur qurilmalar, o‘q-dorilar, bronetexnika, o‘qotar qurollar yetkazilishini ta’minlaydi. Shu bilan birga, minalashtirish va dronlar tizimlariga taqdim qilinadi. Iqtisodiy yordam inqirozga qarshi kurashayotgan va fuqarolariga asosiy xizmatlar ko‘rsatilishiga mas’ul bo‘lgan Ukraina hukumatini to‘g‘ridan to‘g‘ri budjet ko‘magi bilan ta’minlaydi”, — deya qayd etgan Bayden o‘z bayonotida.
Bundan tashqari, Bayden AQSH kongressidan rossiyalik oligarxlarning muzlatilgan mol-mulkidan Ukrainaga yordamni moliyalashtirishni so‘ragan.
Shuningdek, Bayden kongressdan Rossiya bilan korrupsion kelishuvlar orqali pul yuvish operatsiyalarini amalga oshirganlik uchun besh yildan o‘n yilgacha qamoq jazosi tayinlash yuzasidan qonunchilikka o‘zgartirishlar kiritishni ham iltimos qilgan.
“Mazkur takliflar davlatimiz tomonidan xalqaro hamkorlar bilan birgalikda amalga oshirilayotgan choralar, jumladan, rossiyalik oligarxlar aktivlarini tergov qilish, sud tartibida musodara qilish va bu orqali ulardan Ukraina uchun foydalanishni jadallashtiradi”, — deyilgan bayonotda.
Reuters’ning qayd etishicha, 24-fevraldan AQSHning Ukrainaga umumiy yordami miqdori 3 milliardni tashkil qilgan. Bu vaqt ichida personal sanksiyalar doirasida muzlatilgan mablag‘lar miqdori esa 30 milliard dollar.
AQSH oxirgi haftalarda Ukrainaga yordamlarni yanada ko‘paytirgan. 21-aprelda Bayden Ukrainaga 800 million dollarlik navbatdagi yordam paketi yetkazilishini e’lon qilgan, ushbu ko‘makka taktik dronlar, gaubitsalar, artilleriya snaryadlari partiyasi kirgan.
24-aprelda Pentagon rahbari Lloyd Ostin va AQSH davlat kotibi Entoni Blinken Kiyevga kelgan, bu yerda Ukraina prezidenti Vladimir Zelenskiy bilan uchrashib, mamlakat mudofaasi uchun 322 million dollardan ziyod mablag‘ ajratilishini va’da qilgandi. Aprel oyida Vashington Kiyevga umumiy miqdori 1,2 milliardlik navbatdagi harbiy yordam transhi yetkazib berilishi haqida bir necha marta bayonot bergan. Bungacha AQSH Ukrainaga 1,7 milliarddan ziyod pul ajratgandi. Boshqa mamlakatlar ham Ukrainaga harbiy ko‘mak berishda davom etmoqda.
Zelenskiy 23-aprelda Kiyevning hamkorlaridan so‘ralgan qurol-yarog‘larni olishni boshlaganini bildirgan. U gap aynan qaysi davlatlardan yetkazib berilayotgan qurollar haqida borayotganiga aniqlik kiritmagan. Biroq Ukraina prezidenti og‘ir artilleriya qurollariga talab yuqori ekanligi haqida bir necha marta gapirgandi.
Kreml Ukrainaga qurol yetkazib berilishi hududdagi vaziyatni beqarorlashtirishi, mamlakatdagi barqarorlik va tartibning tiklanishiga qarshi ishlashini qayd etgan. Rossiyaning AQSHdagi elchisi Anatoliy Antonov qurollarning ko‘p qismi bezorilar, millatchilar, terrorchilar va sobiq mahbuslar qo‘liga tushishi mumkinligidan xavotirdaligini aytgan. Moskva 25-aprelda Vashingtonga norozilik notasi yo‘llagan va unda Kiyevga qurol yetkazib berishni to‘xtatishini talab qilgan.
Izoh (0)