Yaponiyada olti kun oldin yo‘qolgan sayyohlik kemasi topildi

Yaponiyada olti kun avval g‘oyib bo‘lgan kema suvosti kameralari yordamida topildi, deb xabar bermoqda Yaponiya ommaviy axborot vositalari.

NHK telekanali manbalarining ma’lum qilishicha, 29-aprel kuni ertalab Xokkaydo prefekturasidagi Siretoko yarim oroli yaqinida Yaponiya dengiz kuchlarining suvosti kamerasi dengiz tubidan yo‘qolgan kemani topdi. Qayd etilishicha, obyekt sharshara yaqinidagi suvlarda taxminan 100 metr chuqurlikda yotibdi.

Telekanal suhbatdoshlarining aytishicha, kameraga obyektdagi Z, U va I harflari ko‘rinib qolgan. Qirg‘oq qo‘riqlash xodimlari topilma yo‘qolgan “KAZU I” kemasi ekanini tasdiqlagan.

Bortida 24 yo‘lovchi va ikki ekipaj a’zosi bo‘lgan “KAZU I” kemasi 23-aprel kuni Xokkaydo qirg‘oqlari yaqinida g‘oyib bo‘lgandi. Hozirgacha 14 kishining jasadi topilgan.

Avvalroq Atlantika okeanidagi Kanar orollari sohili yaqinida ichida muhojirlar bo‘lgan qayiq halokatga uchrab, 26 kishi bedarak yo‘qolgan edi.

Shuningdek, Gretsiya yaqinida migrantlar bo‘lgan qayiq ag‘darilib ketgani, Madagaskar yaqinida 100 dan ortiq yo‘lovchisi bor kema cho‘kib ketib, kamida 17 kishi halok bo‘lgani, O‘rta Yer dengizida 130 ga yaqin noqonuniy muhojir bedarak yo‘qolgani haqida xabarlar berilgan.