O‘zbekistonda texnikum bitiruvchilari OTMda o‘qishni davom ettirishi mumkin bo‘lgan ta’lim yo‘nalishlari ro‘yxati tasdiqlandi

Texnikum bitiruvchilari oliy ta’lim muassasalarining 2-bosqichidan o‘qishni davom ettirishi mumkin bo‘lgan o‘z sohasiga mos bakalavriat ta’lim yo‘nalishlari ro‘yxati tasdiqlandi. Bu haqda Oliy va o‘rta maxsus ta’lim vazirligi xabar berdi.

Ushbu ro‘yxat orqali texnikum bitiruvchilari oliy ta’lim muassasalarining qaysi bakalavriat ta’lim yo‘nalishlarida o‘qishni davom ettirishlarini bilish mumkin. To‘liq ro‘yxat bilan quyidagi havola orqali tanishish mumkin.

Ma’lumot uchun, 2022/2023-o‘quv yili qabulidan boshlab texnikumlarda o‘rta maxsus professional ta’lim dasturlarini muvaffaqiyatli tamomlagan bitiruvchilar mos bakalavriat ta’lim yo‘nalishlari bo‘yicha kirish imtihonlarisiz yakka tartibdagi suhbat orqali oliy ta’lim muassasalarida 2-bosqichdan o‘qishini davom ettirish huquqiga ega.

Avvalroq O‘zbekistonda besh yillik ish tajribasiga ega xotin-qizlar OTMlarga imtihonsiz qabul qilinishi mumkinligi, mamlakatdagi oliygohlarga kirish uchun topshiriladigan test sinovi fanlar majmuasi, topshiriqlar soni hamda ularni baholash mezonlari tasdiqlangani to‘g‘risida xabar berilgandi.