Buxoroda keshbek chekini talab qilgan fuqaroni “samosud” qilganlar ushlandi. Ular orasida soliq idorasi xodimi ham bor

Buxoro viloyati IIB Jinoyat qidiruv boshqarmasi Uyushgan jinoyatchilikka qarshi kurashish bo‘linmasi hamda DXX Buxoro viloyati boshqarmasi tezkor xodimlari tomonidan keshbek chekini talab qilgan fuqaroni “samosud” qilganlar ushlandi, deb xabar beradi O‘zA.

Ma’lumotlarga ko‘ra, 19-aprel kuni bir guruh fuqarolar oldindan til biriktirib, 29 yoshli fuqaro D.M.ni Buxoro shahar “Karvon bozor” avtoshohbekatidan Lacetti rusumli avtomashinaga majburan mindirib, Buxoro shahar “Ko‘kaldosh” MFY Gulshan ko‘chasida joylashgan qurilishi tugallanmagan uyga olib ketgan.

Uyushgan jinoiy guruh a’zolari bu yerda uni turli xildagi nojo‘ya so‘zlar bilan haqoratlab, sha’ni va qadr-qimmatini kamsitgan. Unga jismoniy kuch hamda ruhiy tazyiq o‘tkazilgan, tanasining turli joylariga bir necha marotaba urib, tan jarohati yetkazilgan.

Shu vaqt guruh a’zolari tezkor tadbir ishtirokchilari tomonidan jinoyat ustida qo‘lga olingan. Mazkur holat yuzasidan viloyat prokuraturasi tomonidan Jinoyat kodeksining 137-moddasi (odam o‘g‘irlash) 2-qismi bilan jinoyat ishi qo‘zg‘atilgan.

Surishtiruvlar jarayonida jinoiy guruh a’zolari o‘ziga to‘q, oilali, oliy ma’lumotli hatto oralarida rahbar lavozimlarida ishlab turganlar ham borligi aniqlangan. Dastlabki ma’lumotlarga ko‘ra, kaltaklangan fuqaro shunchaki o‘z haq-huquqini talab qilgan. Ya’ni u savdo do‘konlarida xaridorlarga chek bermayotgan va shu orqali davlat g‘aznasiga tushishi kerak bo‘lgan soliqdan qochib yurgan tadbirkorlar haqida ma’lumotlar to‘plagan va ularni tegishli idoralarga yetkazgan.

Ta’kidlanishicha, “jabrdiydalarga” o‘ziga xos qasd olib jazolashni taklif qilgan kimsaning o‘zi soliq idorasi xodimi.

Jinoiy guruh a’zolari orasida yigitdan alamzada bo‘lib yurganlar ham bo‘lgan va shu yo‘l orqali undan qasd olishni rejalashtirgan. Mazkur zo‘ravonlar Jinoyat-protsessual kodeksining 221-moddasi (ushlab turish asoslari) tartibida ushlangan. Hozirda tergov-surishtiruv harakatlari olib borilmoqda.

Avvalroq Buxoroda xarid chekini bermagan savdogar bu haqda soliqchilarga xabar qilgan xaridorni kaltaklagandi.