27-aprel kuni Toshkent shahar hokimi Jahongir Ortiqxo‘jayev Sankt-Peterburg Tashqi aloqalar bo‘yicha qo‘mitasi raisi Yevgeniy Grigorev boshchiligidagi delegatsiyani qabul qildi. Bu haqda poytaxt hokimligi matbuot xizmati xabar berdi.
Uchrashuv 15—16-sentabr kunlari Samarqandda o‘tkazilishi rejalashtirilgan SHHT sammitidan keyin Sankt-Peterburg gubernatori Aleksandr Beglovning Toshkentga tashrifiga tayyorgarlik ko‘rishga bag‘ishlangan. Yevgeniy Grigorev Ikkinchi jahon urushi yillarida Leningrad blokadasi qurbonlariga boshpana bergan toshkentliklarga yodgorlik o‘rnatishga ajratilgan joy hamda samimiy qabul uchun hokimga minnatdorlik bildirgan.
So‘ngra Sankt-Peterburg gubernatorining rejalashtirilgan tashrifi kun tartibiga kiritish uchun turli takliflar ko‘rib chiqilgan:
- Beryozin nomidagi Tibbiyot institutining Davolash-diagnostika markazida onkologiyaga chalingan bolalarni davolash fondini tashkil etish, shuningdek, erta tug‘ilgan chaqaloqlarda ko‘rlikni davolash uchun Sankt-Peterburg shifokorlarining ijobiy tajribasidan foydalanish;
- Iqtisodiy aloqalarni rivojlantirishni rag‘batlantirish uchun Toshkent va Sankt-Peterburg aholisidan iborat potensial sayyohlarga har ikki shahar haqida taqdimot videoroliklarini tayyorlash;
- Leningrad blokadasidan aziyat chekkanlarga boshpana bergan o‘zbeklarga bag‘ishlangan yodgorlikning tamal toshini tantanali ravishda qo‘yish. Yodgorlikni o‘rnatilgan joyi bilan bog‘lash va Sankt-Peterburg me’morlari uni milliy an’analarni hisobga olgan holda loyihalashi uchun toshkentlik arxitektorlarni jalb qilish;
- Toshkent shahridagi Sankt-Peterburg savdo uyi va Sankt-Peterburg shahridagi Toshkent savdo uyini yer maydonini ajratib berish bilan paritet asosda qurish;
- Nufuzli xalqaro va biznes obyektlari uchun ekologik toza mebel ishlab chiqarish va ofis dizaynini rivojlantirishni qo‘llab-quvvatlash. Paxtadan gazlama va ip-kalava ishlab chiqarish klasterini rivojlantirishga ko‘maklashish.
- Sankt-Peterburg Jismoniy tarbiya universitetidan mahalliy murabbiylarga sportning 59 turi bo‘yicha sohadagi eng so‘nggi ilmiy ishlanmalar asosida malaka oshirish uchun taklifnoma. Hokimlik muntazam ravishda 10-20 nafar murabbiyni o‘qishga yuborish niyatida;
- O‘zbekistonni Sankt-Peterburgda yaratilayotgan yirik logistika markazi loyihasida ishtirok etishga taklif qilish;
- “Vodokanal Sankt-Peterburga” davlat unitar korxonasining oqava suvlarni tozalash bo‘yicha mutaxassislaridan tajriba almashish uchun taklifnoma.
Ma’lumot uchun, Leningrad qamali paytida urushdan, sovuqdan va ochlikdan 420 ming nafar aholi vafot etgan, shulardan 7 ming nafari o‘zbekistonlik askarlar bo‘lgan va ular xotirasiga Sankt-Peterburg shahridagi Pskaryevskiy qabristonida yodgorlik o‘rnatilgan.
Izoh (0)