Qashqadaryo tog‘larida “Qizil kitob”ga kiritilgan qo‘ng‘ir ayiq va uning ikki bolasi aholi tomondan suratga tushirilgani haqida xabar berilgandi. Keyinroq topilgan qo‘ng‘ir ayiq bolalaridan biri o‘ldirilgani ma’lum bo‘ldi. Davlat ekologiya qo‘mitasiga ko‘ra, ushbu ayiq bolasi bilan bog‘liq holat yuzasidan to‘plangan hujjatlar Ichki ishlar organiga o‘tkazilgan.
Avvalroq Davlat ekologiya qo‘mitasi inspektorlari va tuman IIB xodimlari bilan birgalikda olib borilgan tezkor qidiruv natijasida gumondor shaxs Dehqonobod tumani “Oqqishloq” MFY, “Qizilsoy” qishlog‘ida yashovchi fuqaro K.Sh. ekani aniqlangan va uning xonadoni tekshirilganida bir dona ayiq bolasining terisi topilgandi.
Ayiq bolasi terisi dalolatnoma asosida olib qo‘yilib ekspertizaga yuborilgan. Holatdan xabardor bo‘lgan barcha fuqarolardan yozma tushuntirish xatlari olingan.
Yuqoridagi holat bilan “Ekologik nazorat to‘g‘risida”gi, “Tabiatni muhofaza qilish to‘g‘risida”gi, “Hayvonot dunyosini muhofaza qilish va undan foydalanish to‘g‘risida”gi hamda “Muhofaza etiladigan tabiiy hududlar to‘g‘risida”gi qonunlar talablari qo‘pol ravishda buzilib, Jinoyat kodeksining 202-moddasida (hayvonot yoki o‘simlik dunyosidan foydalanish tartibini buzish) nazarda tutilgan jinoyat alomatlari borligi sababli, to‘plangan hujjatlar Dehqonobod tuman Ichki ishlar bo‘limiga o‘tkazilgan.
Hayvonot dunyosi monitoringini o‘tkazish natijalariga ko‘ra, O‘zbekistonda 600 ga yaqin qo‘ng‘ir ayiq aniqlangan bo‘lib, keyingi yillarda ikki baravar ko‘paygan. Hozirda Hisor qo‘riqxonasida ayiqlar soni 147 boshni tashkil etadi.
Mavzuga doir:
Izoh (0)