Davlat xavfsizlik xizmati xodimlari tomonidan Toshkent viloyatida o‘tkazilgan tezkor tadbirda hokim yordamchisi pora bilan qo‘lga olindi, deb xabar beradi O‘zA.
Ma’lum qilinishicha, Toshkent tumanida yashovchi 40 yoshli shaxs mazkur tumandagi mahalla fuqarolar yig‘inlaridan birida hokim yordamchisi lavozimda ishlovchi sinfdoshi bilan kelishgan holda o‘zganing ishonchiga kirib, Toshkent shahar Olmazor tumanida joylashgan 4 sotix yer maydonini mansabdor tanishlari orqali uning nomiga rasmiylashtirib berishni va’da qilgan. Ular o‘z “xizmati evaziga” 30 ming dollar talab qilishgan.
DXX va Bosh prokuratura huzuridagi departament xodimlari tomonidan o‘tkazilgan tezkor tadbirda 40 yoshli shaxs so‘ralgan pulni olgan vaqtida ushlangan. Shuningdek, uning ko‘rsatmasi asosida hokim yordamchisi ham qo‘lga olingan.
Avvalroq Zangiota tumani hokimi yordamchisi pora olayotganida DXX tomonidan ushlangani, Ohangaron hokimligi xodimi 20 ming dollar pora bilan qo‘lga tushgani, Qo‘qon shahar hokimining 10 ming dollar pora olgan birinchi o‘rinbosari 5 yarim yilga qamalgani to‘g‘risida xabar berilgandi.
Izoh (0)