Qirg‘iziston O‘zbekiston bilan chegarada qo‘shimcha yana 3-4 ta o‘tkazish punkti ochishni rejalashtirmoqda. Bu haqda mamlakat tashqi ishlar vazirligiga nomzod Jeenbek Kulubayevga tayanib, AKIpress xabar berdi.
Ma’lum qilinishicha, Jogorku Kenesh majlisida deputat Eldar Sulaymanov Chekobod qishlog‘idagi nazorat-o‘tkazish punkti yopilgani haqida savol bergan.
“Mendagi bor ma’lumotlarga ko‘ra, chegarani ochish uchun Qirg‘izistonga 40 kishidan iborat O‘zbekiston delegatsiyasi keladi. Sizga bu borada yordam berishingizni iltimos qilaman”, — degan deputat.
Jeenbek Kulubayev bu masala Qirg‘iziston va O‘zbekiston bosh vazirlari uchrashuvida ko‘tarilganini qayd etgan.
“Biz shartlarni hisobga olishimiz kerak, ularning tomoni qanday ish qiladi va bizniki nima qiladi. Biz bu masalani anchadan beri muhokama qilmoqdamiz, bu yil 3-4 ta nazorat-o‘tkazish punktini ochish uchun sharoit yaratamiz”, — deydi Kulubayev.
Avvalroq Qirg‘izistonda O‘zbekiston tomonidan qurilgan yangi maktab ochilgani, Qirg‘izistonning O‘zbekistondagi yangi elchisi lavozimiga kirishgani, Qirg‘iziston bosh vaziri Xitoy—Qirg‘iziston—O‘zbekiston temiryo‘li bo‘yicha kelishuvga erishilganini ma’lum qilgani to‘g‘risida xabar berilgandi.
Izoh (0)